26.05.2026 | 22:13
ՀՀ-ում ոչ մի ադրբեջանցի չի բնակեցվելու. Միրզոյան. ՏԵՍԱՆՅՈՒԹ
Ուկրաինան ձգտում է ամրապնդել դիրքերը ՌԴ-ի հետ բանակցություններից առաջ. Reuters
Քաղաքականություն
12.11.2024 | 17:13
Մինչ ԱՄՆ նախագահ Դոնալդ Թրամփի պաշտոնավարումը՝ Ուկրաինան նախատեսում է Ռուսաստանի հետ բանակցությունների համար առավել շահեկան դիրք գրավել, գրում է Reuters-ը՝ վկայակոչելով ուկրաինացի բարձրաստիճան պաշտոնյային։
Աղբյուրի խոսքով՝ Ուկրաինան հակամարտության ընթացքի համար վճռորոշ է համարում առաջիկա չորսից հինգ ամիսները։
«Այժմ մենք կորոշենք երկու կողմերի դիրքորոշումները բանակցություններում, մեկնարկային դիրքերը»,- ասել է գործակալության անանուն զրուցակիցը։
Միևնույն ժամանակ, նա նշել է, որ Դոնալդ Թրամփի հաղթանակից հետո Ուկրաինայի անդամակցությունը ՆԱՏՕ-ին դարձել է «ավելի քիչ հավանական», մինչդեռ ռազմական օգնության կրճատման ռիսկը զգալիորեն աճել է։ Այս առումով Ուկրաինայի իշխանությունները հուսով են գործող նախագահ Ջո Բայդենի վարչակազմի օգնության հարցում՝ մինչ 2025 թվականի հունվարի 20-ին Դոնալդ Թրամփի երդմնակալությունը։
Դոնալդ Թրամփը բազմիցս խոստացել է ստիպել Ռուսաստանին և Ուկրաինային վերսկսել խաղաղության բանակցությունները։ Նոյեմբերի 7-ին՝ նախագահական ընտրություններում հաղթելուց երկու օր անց, հանրապետական գործիչը հեռախոսազրույց է ունեցել Ուկրաինայի նախագահ Վլադիմիր Զելենսկիի հետ, որից հետո Ուկրաինայի ԱԳՆ-ն հայտարարել է նրանց հանդիպման նախապատրաստման մասին։
Արևմտյան լրատվամիջոցները պնդում էին, որ Դոնալդ Թրամփը զրուցել է նաև ՌԴ նախագահ Վլադիմիր Պուտինի հետ, սակայն Կրեմլում այդ տեղեկությունը «հորինվածք» են անվանել։
Թարգմանությունը՝ Տաթև Ֆռանգյանի
