08.10.2026 | 15:01
Հայտնի է ազատ ոճի ըմբշամարտի Հայաստանի հավաքականի կազմն ԱԱ-ում
Աբխազիայում ընդդիմադիրների ձերբակալությունից հետո ակցիաներ են․ ցուցարարները կամուրջներ և ճանապարհներ են փակել․ ՏԵՍԱՆՅՈՒԹ
Քաղաքականություն
12.11.2024 | 15:50
Աբխազիայում ինքնաբուխ ցույցեր են անցկացվում, ցուցարարները փակել են հանրապետական մայրուղին և Գումիստա ու Կոդորի կամուրջները։ «Էխո Կավկազա»-ի հաղորդմամբ՝ ցուցարարները պահանջում են ազատ արձակել ակտիվիստներին, որոնք ձերբակալվել են, իբր, տեղի խորհրդարանի շենքի մոտ պատգամավորներից մեկի հետ բախումից հետո։
Որոշ ցուցարարներ հավաքվել են Պետական անվտանգության ծառայության (ՊԱԾ) շենքի մոտ և փորձել են կոտրել դարպասը։ Աբխազիայի նախագահի նստավայրին ստիպված են եղել զինտեխնիկա մոտեցնել։
Աբխազիայի նախագահ Ասլան Բժանիան արտակարգ խորհրդակցություն է անցկացրել, հայտնում է Apsnypress-ը։ Հանրապետության ղեկավարին զեկուցվել է, որ բողոքի ցույցերի հետ կապված իրավիճակը վատթարանում է, իսկ ցուցարարների գործողությունները «հանցավոր բնույթ են կրում»։
Պետական անվտանգության ծառայության ղեկավար Դմիտրի Կուչուբերիան տեղի ունեցածն անվանել է «զանգվածային անկարգություններ»։
Սուխումում բողոքի ցույցերը սկսվել են նոյեմբերի 11-ին։ Տեղական տելեգրամյան ալիքների տվյալներով՝ ձերբակալված ընդդիմադիրները դեմ են արտահայտվել Ռուսաստանի հետ ներդրումային համաձայնագրի վավերացմանը։ Նշվում են նրանց անունները՝ Օմար Սմիր, Հարրի Կոկայա, Ալմասխան Արձինբա, Ռամազ Ջոպուա և Ասլան Գվարամիա։
Թարգմանությունը՝ Տաթև Ֆռանգյանի
