Ստամբուլի ընդդիմադիր քաղաքապետը հերքել է իշխանությունների կողմից իր պաշտոնանկության հնարավորությունը

Ստամբուլի ընդդիմադիր քաղաքապետ Էքրեմ Իմամօղլուն բացառել է իրեն պաշտոնից հեռացնելու հնարավորությունը շահարկումների ֆոնին, որոնք ի հայտ են եկել վերջերս մի քանի ընտրված քաղաքապետերի պաշտոններից հեռացնելուց հետո, գրում է Turkish Minute-ը։

«Ստամբուլի 16 միլիոն բնակիչները նման պատկերացում չունեն։ Նման սցենար չկա»,- Ստամբուլի Էսենյուրթ թաղամասում լրագրողներին ասել է Իմամօղլուն։

Էսենյուրթի քաղաքապետ Ահմեթ Օզերը ձերբակալվել և պաշտոնից հեռացվել է հոկտեմբերի վերջին՝ ահաբեկչության հետ կապված մեղադրանքներով, նրան փոխարինել է կառավարության կողմից նշանակված հոգաբարձուն: Իմամօղլուն և Օզերը գլխավոր ընդդիմադիր Ժողովրդահանրապետական կուսակցության (CHP) անդամներ են։

Օզերի հեռացումից հետո, որը լայնածավալ դատապարտում և բողոքի ալիք բարձրացրեց, Թուրքիայի ներքին գործերի նախարարությունն օրերս հայտարարեց քրդամետ Ժողովուրդների հավասարություն և ժողովրդավարություն կուսակցությունից (DEM) երեք քաղաքապետերի պաշտոնանկության մասին, որոնք ներկայացնում էին Մարդին և Բաթման քաղաքները, ինչպես նաև Հալֆեթին շրջանը Շանլըուրֆա նահանգում։ Բոլոր չորս պաշտոնյաները պաշտոնանկ են արվել ահաբեկչության հետ կապված հանցագործությունների մեղադրանքներով՝ սկսած զինված խմբավորմանն անդամակցությունից մինչև Քուրդիստանի աշխատավորական կուսակցության (PKK) քարոզչություն տարածելը:

Ընտրված քաղաքապետերի հեռացումը պատճառ է դարձել այն պնդումների, որ Թուրքիայի նախագահ Ռեջեփ Թայիփ Էրդողանը կարող է թիրախավորել իր ամենաուժեղ քաղաքական մրցակցին՝ Իմամօղլուին, որպեսզի արգելափակի 2028 թվականին նախատեսված ընտրություններում նախագահի թեկնածու առաջադրվելու նրա հեռանկարները։

CHP-ի առաջնորդ Օզգուր Օզելը Sözcü TV-ին ասել է, որ իր կուսակցությունը ծրագիր ունի Իմամօղլուի պաշտոնանկության դեպքում, սակայն կուսակցությունը նման զարգացում չի տեսնում։ Օզելը կարծում է, որ եթե կառավարությունն Իմամօղլուին հեռացնի պաշտոնից, դա միայն կծառայի նրա հանրային աջակցությունը մեծացնելուն։

«Եթե Էրդողանն ուզում է Իմամօղլուին դարձնել հաջորդ նախագահ, ապա կարող է նման քայլի գնալ»,- ասել է Օզելը՝ հավելելով, որ Էրդողանը չի էլ կարող պատկերացնել, թե որքան մեծ կլինի հանրային աջակցությունը, եթե Իմամօղլուին  պաշտոնանկ անեն։

Նշենք, որ Էքրեմ Իմամօղլուն մարտի 31-ի ՏԻՄ ընտրություններում ընտրվել է երկրորդ ժամկետում՝ մեծ տարբերությամբ գերազանցելով Էրդողանի իշխող «Արդարություն և զարգացում» կուսակցության (ԱԶԿ) թեկնածուին՝ ստանալով ձայների 51,1 տոկոսը, իսկ ԱԶԿ-ի թեկնածու Մուրադ Քուրումը ստացել է ընդամենը 39,5 տոկոս ձայն։

Թարգմանությունը` Էմմա Չոբանյան