Շտապօգնության ծառայության անշտապ աշխատանքը կբարելավվի՞. ի՞նչ են ասում պատասխանատուները. ՏԵՍԱՆՅՈՒԹ

Շտապօգնությամբ  Չինաստանը ձեռք էր մեկնել Հայաստանի առողջապահությանը  դեռևս 2011 թվականին: 88 շտապօգնության  մեքենաների նվիրատվությունը թարմացրել էր Հայաստանի շտապօգնության պարկը: Սակայն, այս  ծառայությունից  քաղաքացիների դժգհություններն այդպես էլ  չդադարեցին. հաճախ ուշացումներ ու երբեմն բժիշկների անտարբեր վերաբերմունք:

Մարգարիտա Դավթյանը  պատմում է, որ մեր երկրում շտապօգնությունը միշտ վերջում է տեղ հասնում:  Նրա համոզմամբ՝ վերջին շրջանում շտապօգնության կանչերի ուշացումներն ավելի  նկատելի են դարձել: «Վերջին շրջանում տղայիս հետ կապված շտապօգնություն էինք կանչել և բավականին երկար ուշացում գրանցեցինք: Պատճառաբանեցին, որ հասցեն չեն գտնում, բայց մենք անընդհատ իրենց հետ կապի մեջ էինք»,- նշեց մեր զրուցակիցը։

Վերջին թարմ դեպքին էլ նա ականատես է եղել ընդամենը տասը օր առաջ: «Սպասարկումը նույնպես  շատ վատ է, որովհետև մարդն ուներ 40-ից ավել բարձր ջերմություն, հետո թոքաբորբ բացահայտվեց, բայց շտապօգնությունը նույնիսկ չէր պատրաստվում տեղափոխել հիվանդանոց»,- պատմում է Մարգարիտան։

Առողջապահության նախարարության բժշկական օգնության քաղաքականության վարչության պետ Դավիթ Մելիք-Նուբարյանը, սակայն համամիտ  չէ, որ վերջին շրջանում շտապօգնության ծառայությունը դժգոհությունների առիթ է տալիս: Նրա խոսքով՝ իրականությունն այքան էլ այդպես չէ, մասնավորապես դրա մասին են վկայում ամեն տարի քաղաքացիների կողմից շտապօգնության կանչերի թվի ավելացումը. «Եթե 2014 թվականին Երևանում եղել է 215 հազար կանչ, ապա 2016-ին թիվը հասել է 230 հազարի: Այսինքն՝ մարդիկ վստահում են շտապօգնության  ծառայությանը և դիմում են»։

Նրա պնդմամբ՝  քաղաքային  համայնքներում շտապօգնությունը գրեթե անխափան է գործում: «Ինչ վերաբերում է գյուղական բնակավայրերի սպասարկմանը, ապա առկա են  որոշակի դժվարություններ. ֆինանսական, ինչպես նաև  մասնագիտական կադրերով ապահովման խնդիր: Առաջիկայում, սակայն, այդ հարցն էլ կլուծվի»,- հավաստիացնում է մասնագետը:

Երևանի քաղաքապետարանի շտապբուժօգնության վարչության տնօրեն  Թագուհի Ստեփանյանը մեզ հետ զրույցում նշեց, որ միջին հաշվով օրական 650-700 կանչ է գրանցվում: Առաջին տեղում սրտանոթային հիվանդություններն են, որից հետո սուր շնչառականը, իսկ 3-րդ տեղում՝ տրավմաները: Անհետաձգելի շտապօգնության կանչերի դեպքում որպես չափորոշիչ սահմանված է մինչև 15 րոպե ժամանակը:

Մանրամասները՝ տեսանյութում։

Անի Մնացականյան