ԱՄՆ-ը Չինաստանին կոչ է արել հասնել ՌԴ-ից հյուսիսկորեացի զինվորների դուրսբերման

ԱՄՆ-ը Չինաստանին կոչ է արել հասնել Ռուսաստանի Դաշնությունում տեղակայված հյուսիսկորեական զորքերի՝ մշտական ​​տեղակայման վայրեր վերադարձին։ Վաշինգտոնը Պեկինին հորդորել է ճնշում գործադրել Հյուսիսային Կորեայի ղեկավարության վրա, որի հետ նրանք հարաբերություններ են պահպանում։ Այս մասին հայտնել է CNN-ը՝ վկայակոչելով ամերիկացի անանուն պաշտոնյաներին, փոխանցում է DW-ի ռուսական ծառայությունը։

Աղբյուրներից մեկն ասել է, որ ԱՄՆ նախագահի ազգային անվտանգության հարցերով խորհրդական Ջեյք Սալիվանը նաև հանձնարարել է մի շարք այլ երկրների համոզել կապ հաստատել Պեկինի հետ՝ կապված հյուսիսկորեական զորքերը Ռուսաստան ուղարկելու շուրջ ստեղծված իրավիճակի հետ։ CNN-ի զրուցակիցները, սակայն, խոստովանել են՝ արևմտյան պաշտոնյաները «լավատես չեն, որ Չինաստանը կմիջամտի Հյուսիսային Կորեայի ծրագրերին»։

Նախօրեին Պենտագոնը հայտարարել էր, որ մի քանի հազար հյուսիսկորեացի զինվորներ շարժվել են դեպի Կուրսկի շրջան, և նրանցից ոմանք արդեն այս շրջանում են։

«Մենք  նախկինի պես անհանգստացած ենք, որ Ռուսաստանը մտադիր է օգտագործել այդ զինվորներին Կուրսկում ուկրաինական ուժերի դեմ մարտերում կամ աջակցության համար»,- ասել է ԱՄՆ պաշտպանության նախարարության խոսնակ Պատրիկ Ռայդերը:

Պենտագոնը տեղակայված ուժերի թիվը գնահատում է 10 հազար։

Ռուսաստանը և ԿԺԴՀ-ն ավելի վաղ հայտարարել էին, որ ռազմական համագործակցությունն իրականացվում է «համապարփակ ռազմավարական գործընկերության» համաձայնագրի շրջանակում, որը ստորագրվել է ամռանը Փհենյանում և վավերացվել Պետդումայի կողմից աշնանը։

ՌԴ նախագահ Վլադիմիր Պուտինն անցյալ շաբաթ չէր հերքել Հյուսիսային Կորեայից ռազմական անձնակազմի տեղափոխումը՝ ասելով․ «Ինչ և ինչպես մենք կանենք այդ հոդվածի շրջանակում (Ռազմավարական գործընկերության համաձայնագրի), մեր գործն է»։

Թարգմանությունը՝ Էմմա Չոբանյանի