22.12.2024 | 18:07
Արթիկի տարածաշրջանում թույլ ձյուն է տեղում
Աթաթուրքի մասին ֆիլմի եվրոպական ցուցադրության խափանման համար Թուրքիայում մեղադրում են «հայկական լոբբիին»
Քաղաքականություն
29.10.2024 | 16:52
Թուրքիայի Հանրապետության հիմնադիր Մուստաֆա Քեմալ Աթաթուրքի մանկության մասին պատմող առաջին անիմացիոն «Մուստաֆա» ֆիլմը խոչընդոտների է հանդիպել եվրոպական երկրներում։ Հոկտեմբերի 25-ին թուրքական քաղաքներում թողարկված ֆիլմը պրեմիերայից մի քանի ժամ առաջ ցուցադրությունից հանվել է եվրոպական երկրներում, գրում են թուրքական լրատվամիջոցները։
Cumhuriyet-ի հետ հարցազրույցում ֆիլմի պրոդյուսերներից Քամուրան Այնան խոսել է սահմանափակումների մանրամասների մասին։ Նա նշել է, թե «հայկական լոբբին է արգելափակել» ֆիլմի ցուցադրությունը։
«Միլիոնավոր մեր քաղաքացիներ ապրում են Եվրոպայում։ Ելնելով այն հանգամանքից, որ այնտեղի մեր երեխաները նույնպես իրավունք ունեն ճանաչել իրենց երկրի հիմնադիր առաջնորդ Աթաթուրքին, մենք նախաձեռնություններով հանդես եկանք եվրոպական ցուցադրությունների համար։ Սկզբում շատ դրական արձագանքներ և աջակցություն ստացանք, սակայն ցուցադրման օրերի մոտենալուն զուգընթաց՝ ամեն ինչ կտրուկ փոխվեց։ Նախնական պայմանավորվածություններ ձեռք բերելուց հետո ամեն օր զանգեր ենք ստանում տարբեր երկրներից։ Բոլորը հանկարծ սկսեցին արտահայտել կինոթատրոնների կողմից իրենց փոխանցած բողոքները։ Արդյունքում մենք այս պահին չենք կարող մեր ֆիլմը ցուցադրել Եվրոպայում»,- պատմել է նա՝ հավելելով, որ մերժումը նախ եղել է Ավստրիայից, ապա՝ Գերմանիայից։
Թարգմանությունը՝ Էմմա Չոբանյանի
