22.12.2024 | 18:07
Արթիկի տարածաշրջանում թույլ ձյուն է տեղում
Հյուսիսային Կորեան ՌԴ-ին միլիարդավոր դոլարների զենք է մատակարարել
Քաղաքականություն
28.10.2024 | 22:33
Ռուսաստանին հյուսիսկորեական զենքի մատակարարումների ծավալը կազմում է միլիարդավոր դոլարներ։ Այս մասին հաղորդում է գերմանական Ֆրիդրիխ Նաումանի հիմնադրամը, գրում է DW-ի ռուսական ծառայությունը։
Ըստ հիմնադրամի՝ Ուկրաինայի դեմ Ռուսաստանի լայնամասշտաբ պատերազմի սկզբից ի վեր Հյուիսային Կորեան Մոսկվային է փոխանցել 1,7 միլիարդից մինչև 5,5 միլիարդ դոլարի զենք։ Նշվում է, որ Ռուսաստանի հետ ռազմական համագործակցության արդյունքում Փհենյանի եկամուտները կարող են ավելանալ 100 միլիոնավոր դոլարներով, եթե Հյուսիսային Կորեայի զորքերը ներգրավվեն Ուկրաինայի դեմ պատերազմում։
Հյուսիսային Կորեայի կողմից Ռուսաստան զենքի մատակարարումների ծավալի ճշգրիտ գնահատումն անհնար է, քանի որ Փհենյանում իշխանությունները զենքի արտահանման վերաբերյալ տվյալներ չեն հրապարակում։
Իրենց զեկույցներում Հարավային Կորեայի հետախուզական ծառայությունները, ի թիվս այլ բաների, հիմնվում են արբանյակային պատկերների տվյալների վրա, որոնք ստացվել են ծովով Հյուսիսային Կորեայի մատակարարումներին հետևելիս: Այդ տեղեկատվության համաձայն՝ Փհենյանը Ռուսաստանին մատակարարում է հիմնականում հրետանային արկեր և փոքր հեռահարության հրթիռներ։
«Ուկրաինայում պատերազմը վատթարացրել է անվտանգության իրավիճակն Արևելյան Ասիայում: Ռուսաստանը և Հյուսիսային Կորեան ջանքեր են գործադրում միջազգային կարգը ապակայունացնելու համար»,- ասել է Ֆրիդրիխ Նաումանի հիմնադրամի հարավկորեական մասնաճյուղի ղեկավար Ֆրեդերիկ Շպորը։
«Պուտինի գործընկերը» անվանումով հետազոտությունն իրականացրել է Հարավային Կորեայի Հանկուկի օտար լեզուների համալսարանից, ուսումնասիրվել են հատուկ ծառայությունների զեկույցները, հասանելի դարձած գաղտնի փաստաթղթերը, ինչպես նաև ավելի վաղ հյուսիսկորեական զենքի վաճառքից ստացված զինամթերքի արժեքը:
Հարավային Կորեայի Կենտրոնական բանկը գնահատում է, որ 2023 թվականին Հյուսիսային Կորեայի ՀՆԱ-ն կազմել է 23 միլիարդ դոլար։ Վերջին շաբաթների ընթացքում տեղեկություններ են հայտնվել Ուկրաինայի դեմ Ռուսաստանի պատերազմին հյուսիսկորեացի զինվորականների հնարավոր մասնակցության մասին։
ՆԱՏՕ-ն հաստատել է հյուսիսկորեական զորքերի տեղափոխումը Ռուսաստան, իսկ Փհենյանը հերքում է։
Թարգմանությունը՝ Էմմա Չոբանյանի
