10.08.2026 | 23:23
ԹԻՀԿ-ն ուսումնասիրել է Երևանի 70 բարեկարգված բակերի ու խաղահրապարակների որակն ու անվտանգությունը
Պուտինը ԲՐԻԿՍ-ի գագաթնաժողովի շրջանակում կհանդիպի Թուրքիայի և Իրանի նախագահների հետ
Քաղաքականություն
23.10.2024 | 11:44
ՌԴ նախագահ Վլադիմիր Պուտինն այսօր ԲՐԻԿՍ-ի գագաթնաժողովի շրջանակում բանակցություններ կվարի Թուրքիայի նախագահ Ռեջեփ Թայիփ Էրդողանի և Իրանի նախագահ Մասուդ Փեզեշքիանի հետ։
Կազանի բանակցություններում Պուտինը և Էրդողանը կարող են քննարկել Անկարայի միջնորդությունն ուկրաինական հակամարտության կարգավորման հարցում, այս մասին ՌԻԱ Նովոստիին հայտնել է Թուրքիայի նախագահի աշխատակազմում բարձրաստիճան աղբյուրը։
Քննարկման մեկ այլ թեմա կարող է լինել էներգետիկ համագործակցությունը և Թուրքիայում գազային հանգույցի կառուցումը։
Կազանում տեղի կունենա նաև մեկ ամսվա ընթացքում Պուտինի երկրորդ հանդիպումը Իրանի նախագահ Մասուդ Փեզեշքիանի հետ։ Ամսվա սկզբին Աշխաբադում կայացած բանակցություններում պետությունների ղեկավարները նշել էին Մոսկվայի և Թեհրանի դիրքորոշումների սերտությունը միջազգային ասպարեզում։
Ռուսաստանը և Իրանը պայմանավորվել են երկու երկրների միջև համապարփակ ռազմավարական գործընկերության շուրջ։ Ավելի վաղ մամուլում տեղեկություններ կային, որ փաստաթուղթը կարող է ստորագրվել Կազանում ԲՐԻԿՍ-ի գագաթնաժողովի ժամանակ, սակայն Պուտինն ու Փեզեշքիանը Թուրքմենստանում զրույցի ժամանակ պայմանավորվել են, որ փաստաթուղթը կստորագրվի առանձին այցի ժամանակ։
Թարգմանությունը՝ Տաթև Ֆռանգյանի
