09.09.2026 | 08:46
Փաշինյանը մեկնել է Ֆրանսիա՝ մասնակցելու Միջազգային տիեզերական գագաթնաժողովին
Ֆրանսիայի ՊՆ ղեկավարը կոչ է արել քննարկել «ոչ միջուկային ուժերի» տեղակայումը Ուկրաինայում՝ ՌԴ-ին զսպելու համար
Քաղաքականություն
22.10.2024 | 14:09
Կիևի դաշնակիցները պետք է քննարկեն Ուկրաինայում ՌԴ-ի դեմ ոչ միջուկային զսպման ուժեր տեղակայելու հարցը, ինչպես հուշում է Ուկրաինայի նախագահ Վլադիմիր Զելենսկիի «հաղթանակի պլանը», հայտարարել է Ֆրանսիայի պաշտպանության նախարար Սեբաստիան Լըկորնյուն։
«Պատկերացրեք հրադադարը կամ խաղաղության պայմանագիրը․ դուք կհասկանաք, որ Ռուսաստանի նոր սպառնալիքը հետ մղելու համար Ուկրաինայի տարածքում ոչ միջուկային զսպող ուժեր տեղակայելու հարցն ակնհայտ է։ Սա հարց է, որով արդեն պետք է զբաղվել»,- ասել է Լըկորնյուն TF1/LCI եթերում:
Նա նշել է, որ Կիևի «հաղթանակի ծրագիրը» ռազմական հակամարտության կարգավորման քաղաքական ճանապարհի միայն սկիզբն է։
«Ուկրաինայի իշխանությունների հռետորաբանության մեջ շրջադարձ կա դեպի «ռազմաքաղաքական» հայտարարություններ, բայց ինչ-որ պահի Ուկրաինան կվերսկսի Ռուսաստանի հետ երկխոսությունը, քանի որ ոչ ոք երբևէ չի հայտարարել ռուսների կապիտուլյացիայի մասին»,- եզրափակել է Լըկորնյուն։
Զելենսկին իր «հաղթանակի պլանը» ներկայացրել է հոկտեմբերի կեսերին։ Այն բաղկացած է հինգ կետից ու ևս երեք «գաղտնի լրացումներից»: Հայտարարված կետերից են Ուկրաինային ՆԱՏՕ-ի անդամակցության հրավեր ուղարկելը՝ մինչև Ռուսաստանի հետ պատերազմի ավարտը, հեռահար զենքի կիրառման սահմանափակումների վերացումը, երկրում «ոչ միջուկային ռազմավարական զսպման համալիր փաթեթի» տեղակայումը և Ուկրաինայի տնտեսությանն օժանդակության զարգացումը։
Թարգմանությունը՝ Տաթև Ֆռանգյանի
