09.09.2026 | 10:41
Հրդեհ Քարաբերդում․ այրվել է մոտ 700 հակ անասնակեր
Բլինքենը ժամանել է Իսրայել՝ պատերազմը դադարեցնելու բանակցությունները վերսկսելու համար
Քաղաքականություն
22.10.2024 | 12:50
ԱՄՆ պետքարտուղար Էնթոնի Բլինքենը Մերձավոր Արևելք կատարած շրջագայության շրջանակում Իսրայել է ժամանել, հայտնում է AFP-ն։ Բլինքենը կհանդիպի Իսրայելի վարչապետ Բենիամին Նեթանյահուի հետ։ Պետքարտուղարն ակնկալում է վերսկսել բանակցությունները Գազայի հատվածում պատերազմի ավարտի և պատանդների ազատ արձակման, ինչպես նաև Լիբանանում հակամարտությունը լուծելու շուրջ։
Էնթոնի Բլինքենի շրջագայությունը կտևի հոկտեմբերի 21-ից 25-ը, հայտնել է Պետքարտուղարությունը։
ԱՄՆ-ը վստահ է, որ այս ուղևորությունը կօգնի առաջ մղել Գազայում հրադադարի շուրջ բանակցությունները, նախօրեին ճեպազրույցում ասել է Պետքարտուղարության մամուլի ծառայության ղեկավարի տեղակալ Վեդանտ Պատելը։ Նրա խոսքով՝ Էնթոնի Բլինքենը «շատ կարևոր բանակցություններ կվարի գործընկերների հետ» Իսրայելում և Մերձավոր Արևելքի այլ երկրներում։
Պետքարտուղարությունը պնդում է, որ հոկտեմբերի 17-ին սպանված պաղեստինյան ՀԱՄԱՍ շարժման քաղբյուրոյի ղեկավար Յահյա Սինվարը նախկինում կանխել է հրադադարի ձեռքբերումը։
Հոկտեմբերի 18-ին ՀԱՄԱՍ-ը հաստատել է իր առաջնորդի մահվան տեղեկությունը, սակայն շարժումը հրաժարվել է վայր դնել զենքերը և հանձնվել։ ՀԱՄԱՍ-ը խոստացել է, որ չի վերադարձնի իսրայելցի պատանդներին՝ մինչև Գազայի հատվածում ռազմական գործողությունների ավարտը և ամբողջ ռազմական անձնակազմի դուրսբերումը գոտուց։ Լրատվամիջոցները գրել են, որ ՀԱՄԱՍ-ը դեռևս փորձում է թաքցնել Յահյա Սինվարի իրավահաջորդի ինքնությունը։
Թարգմանությունը՝ Տաթև Ֆռանգյանի
