Նիկոլ Փաշինյանը «գլուխ է դնում» նախկինում կատարված հանցագործությունների հետ, ոչ թե Քոչարյանի. Արմեն Բաղդասարյան

«Մեդիամաքսն» այսօր հրապարակեց նախկին նախագահ Ռոբերտ Քոչարյանի հետ հարցազրույցը, որում վերջինս ասում է. «Ես սովոր չեմ այդպիսի եզրույթներ օգտագործել, երբ խոսքը վերաբերում է քաղաքական գործընթացներին: Սակայն կարծում եմ, որ Նիկոլ Փաշինյանը կփոշմանի, որ որոշել է հետս «գլուխ դնել»»:

Factor.am-ի հարցին` կա՞ որոշակի սպառնալիք կամ վտանգ այս հայտարարության մեջ, վերլուծաբան Արմեն Բաղդասարյանը պատասխանեց. «Սա կարելի որպես սպառնալիք ընկալել, բայց ես չեմ կարծում, թե Նիկոլ Փաշինյանը «գլուխ է դնում» Քոչարյանի հետ: Իմ պատկերացմամբ` Նիկոլ Փաշինյանը «գլուխ է դնում» նախկինում կատարված հանցագործություններրի հետ` անկախ նրանից, թե ով է դրանցում մեղավոր: Ռոբերտ Քոչարյանը ցանկացել է ասել, որ դա իրենց անձնական հարաբերությունների խնդիրն է, որովհետև «գլուխ դնել» դա է նշանակում, բայց այդպիսի բան չկա»:

Արփինե Հովհաննիսյանը ԵԽԽՎ-ում բարձրացնում է քաղաքական հետապնդումների, օրենսդիր և դատական իշխանությունների անկախության հարցը: Արմեն Բաղդասարյանի խոսքով` մեր ներքին «լվացքը» ցույց տալն աշխարհին անթույլատրելի է: Դա, ըստ մեր զրուցակցի, դրսից «տղա բերելու» հերթական փորձն է, ինչը վնասում է մեր երկրին:

Հարցին` որքանո՞վ են հասարակության համար ընկալելի և վստահելի պաշտոնյաների այն պարզաբանումները, որոնք տրվեցին հայտնի ձայնագրությունների հրապարակումից հետո, վերլուծաբանը պատասխանեց. «Իմ պատկերացմամբ` հասարակությունն արագ վերլուծեց և գտավ գաղտնալսումն իրականացնող ուժերին: Չեմ կարող ասել` ճի՞շտ, թե՞ սխալ: Երևույթը շատ բացասական է: Պատահական չէ, որ հենց երկու քրեական գործ կա` գաղտնալսման և ձայնագրության մեջ քրեական տարրերի առկայության հետ կապված: Հուսանք` այդ հարցերը արագ կբացահայտվեն և կհստակեցվեն, հասարակությունն էլ չի պառակտվի»:

Պարոն Բաղդասարյանն անդրադարձավ նաև Ռուսաստանի զինուժի հետ ՀՀ ՊՆ մասնագետների ներգրավմանը Սիրիայում հումանիտար առաքելության շրջանակներում: Խոսելով հնարավոր ռիսկերի և Արևմուտքի հետ մեր հարաբերությունների վրա ազդեցության մասին, վերլուծաբանն ասաց. «Հաշվի առնելով ռուս-ամերիկյան լարվածությունը` իհարկե, նման վտանգ առկա է: Հուսով եմ, որ Արևմուտքը ըմբռնումով կմոտենա, ինչպես դա եղել է մյուս բոլոր դեպքերում: Հայաստանն այդ հարցում մեծ ընտրություններ չի ունեցել` նկատի ունենալով մեր դաշնակցային պարտավորությունները: Արևմուտքը մեր հանդեպ կտրուկ քայլերի չի դիմի»:

Լևոն Փանոսյան