30.04.2026 | 23:18
ՀՀ 4 քաղաքում մթնոլորտային օդում փոշու պարունակությունը գերազանցել է սահմանային թույլատրելի կոնցենտրացիան
Բայդենը նամակ է ուղարկել Ալիևին՝ կոչ անելով այս տարի ավարտել ՀՀ-ի հետ խաղաղության պայմանագրի կնքումը
Քաղաքականություն
21.10.2024 | 13:47
Ադրբեջանի նախագահ Իլհամ Ալիևն ընդունել է ԱՄՆ նախագահի հատուկ օգնական և Ազգային անվտանգության խորհրդում եվրոպական հարցերով ավագ տնօրեն Մայքլ Քարփենթերին։ Ադրբեջանի նախագահականի հաղորդմամբ՝ Քարփենթերն Ալիևին է հանձնել ԱՄՆ նախագահ Ջո Բայդենի նամակը։
Ադրբեջանական լրատվամիջոցների հաղորդմամբ՝ Բայդենը նամակում նշում է, որ գոհ է Ադրբեջանի և Հայաստանի կողմից ձեռք բերված շարունակական առաջընթացից խաղաղության համաձայնագրի կնքման ուղղությամբ, որը կծառայի երկու երկրների միջև հարաբերությունների կարգավորմանը։
«Ուզում եմ ձեզ վստահեցնել, որ ԱՄՆ-ը պատրաստ է աջակցել Ադրբեջանի և Հայաստանի միջև կայուն և արժանապատիվ խաղաղության ձեռքբերմանը, որը վերջ կդնի դարավոր հակամարտությանը։ Ի հավելումն Ադրբեջանի ինքնիշխանության և տարածքային ամբողջականության ապահովմանը՝ խաղաղության համաձայնագիրը կվերափոխի ամբողջ տարածաշրջանը՝ հնարավորություն տալով ավելի մեծ առևտուր, ներդրումներ և կապ ունենալ Եվրոպայի ու Կենտրոնական Ասիայի միջև: Քանի որ COP29-ում աշխարհի ուշադրությունն ուղղված է դեպի Բաքուն, դուք աննախադեպ հնարավորություն ունեք համաշխարհային հանրությանը ցույց տալու ձեր նվիրվածությունը խաղաղությանը: Խաղաղության համաձայնագրի չլուծված կետերը վերջնական տեսքի բերելը կպահանջի կրեատիվություն և փոխզիջում երկու կողմերից: Բայց վստահ եմ, որ դուք կշարունակեք օգտվել այդ հնարավորությունից։ Հրավիրում եմ համաձայնագրի ստորագրումն ավարտին հասցնել այս տարի»,-ասվում է նամակում։
ԱՄՆ նախագահը նաև աջակցության պատրաստակամություն է հայտնել։
Թարգմանությունը՝ Էմմա Չոբանյանի
