16.01.2025 | 14:44
Ենոքավանում էլեկտրաշչակ է գործարկվելու
Քննարկվել են պոչամբարների անվտանգության գնահատման հարցեր
Տնտեսություն
13.09.2018 | 20:27
«Աջակցություն Հայաստանում արդյունաբերական կուտակիչ ավազանների՝ պոչամբարների անվտանգության բարելավմանը» ծրագրի շրջանակներում «Էկոլոգիան հանուն խաղաղ գոյակցության» հասարակական կազմակերպության նախաձեռնությամբ 2018թ. սեպտեմբերի 3-7-ը Ծաղկաձորում անցկացվել է վերապատրաստման դասընթաց՝ պոչամբարների անվտանգության գնահատման թեմայով. տեղեկացնում է Բնապահպանության նախարարության լրատվական բաժինը:
Դասընթացին մասնակցել են Բնապահպանության, Էներգետիկ ենթակառուցվածքների ու բնական պաշարների, Արտակարգ իրավիճակների նախարարությունների, ինչպես նաև շահագրգիռ պետական և մասնավոր կառույցների ներկայացուցիչներ։ Դասընթացներին մասնակցելու նպատակով Հայաստան էին ժամանել ոլորտի առաջատար մասնագետներ աշխարհի մի շարք երկրներից՝ Գերմանիա, Ավստրիա, Շվեդիա, Շվեյցարիա, Հունգարիա, Սերբիա, Ռումինիա, Ուկրաինա, Մոլդովա, Բելոռուսիա, Ղազախստան, Ղրղզստան, Վրաստան:
Դասընթացը վարել են միջազգային փորձագետները։ Ծրագրի նպատակն էր նոր և առաջադեմ մեխանիզմներով վերազինել այս բնագավառում տարբեր լիազորություններ ունեցող մասնագետների գիտելիքները, որի շրջանակներում գործնական ուսումնասիրություններ են իրականացվել նաև Ախթալայի լեռնահարստացման կոմբինատի «Նահատակ» պոչամբարի տարածքում:
Միջոցառման ընթացքում քննարկվել են պոչամբարների անվտանգության գնահատման, պոչամբարներով պայմանավորված՝ շրջակա միջավայրի դեգրադացիայի և հանքային հումքի կորզումից առաջացող խոշորամասշտաբ թափոնների գոյացման վերաբերյալ հարցեր:
Հայաստանյան պատվիրակության աշխատանքային խմբում էին բարձրագույն ուսումնական հաստատությունների համապատասխան մասնագետներ, այդ թվում՝ Բնապահպանության նախարարության ընդերքի և հողերի պահպանության քաղաքականության վարչության գլխավոր մասնագետ Ա․ Ավագյանը և թափոնների ու մթնոլորտ արտանետումների կառավարման գործակալության գլխավոր մասնագետ Լ․Ղազարյանը:
Դասընթացի ավարտին մասնակիցները պարգևատրվել են համապատասխան հավաստագրերով:
