Իսրայելը կարող է հարվածներ հասցնել Իրանի խոշոր ռազմաբազաներին․ հայտնի են հրթիռային հենակետերի տեղերը․ Արտյոմ Չեռնոմորյան․ ՏԵՍԱՆՅՈՒԹ

Իսրայելը Բեյրութի ուղղությամբ օդային հարվածներ է հասցրել, թիրախը «Հըզբոլլահ»-ի զենքերի ստորգետնյա պահեստն է եղել։ Ջո Բայդենի ու Բենյամին Նեթանյահուի՝ անցած շաբաթ կայացած հեռախոսազրույցից հետո Բեյրութի ուղղությամբ օդային հարվածները դադարել էին։ ԱՄՆ նախագահը շեշտել էր՝ խաղաղ բնակչությանը հասցվող վնասները պետք է նվազագույնի հասցնել։ Լիբանանի իշխանություններն ավելի վաղ հայտարարել էին՝ ԱՄՆ-ն երաշխիքներ է տվել, որ Իսրայելը կսահմանափակի մայրաքաղաքի ուղղությամբ հարվածները։

Ինչո՞ւ կրկին հարվածներ հասցվեցին։ «Իսրայելահայեր» թերթի խմբագիր Արտյոմ Չեռնոմորյանը Factor TV-ի հետ զրույցում ասում է, որ չնայած ամերիկյան և իսրայելական կառավարությունների միջև առկա խնդիրներին, հայտնի հեռախոսազրույցը կայացել է, սակայն կան դեպքեր, երբ Իսրայելի իշխանությունը շրջանցում է քաղաքական պայմանավորվածությունները․ «Երբ Իսրայելի բանակը ստանում է օպերատիվ-մարտավարական հետախուզական տեղեկություններ, որ բացահայտվել է այս կամ այն թիրախը, Նեթանյահուն չի հետևում իր տված խոստումներին, և կանաչ լույս է տալիս բանակին՝ հարվածել «Հըզբոլլահ»-ի այս կամ այն շրջաններին։ Իմ կարծիքով, հերթական հարվածի առիթը սա է եղել, որ հետախուզությանը տվյալներ են հայտնի դարձել կոնկրետ Բեյրութի արվարձանում գտնվող «Հըզբոլլահ»-ի ստորգետնյա հրթիռային կետերի մասին»։

Արտյոմ Չեռնոմորյանի դտիարկմամբ ցամաքային գործողության նպատակը Իրանին ենթարկվող պրոքսի-ուժերին չեզոքացնելն է, և կանխարգելելը Իսրայելի տարածքին հարվածները։

Իսրայելական լրատվամիջոցները հաղորդում էին, որ այդ երկիրը կարող է հարվածներ հասցնել Իրանի միջուկային կամ նավթագազային օբյեկտներին։ ԱՄՆ նախագահ Ջո Բայդենը Իսրայելին զգուշացրել էր զերծ մնալ Իրանի նավթային օբյեկտներին հարվածելուց, որը նավթի աշխարհի խոշորագույն արդյունահանող երկրներից մեկն է: Իրանը զգուշացրել է, որ իր ենթակառուցվածքների վրա ցանկացած հարձակման «կտա էլ ավելի ուժեղ պատասխան»: Կլինի՞ հարված, օրինակ՝ Իրանի միջուկային ենթակառուցվածքներին։

Արտյոմ Չեռնոմորյանն ասում է՝ Իրանը շատ ավելի մեծ մեծ տարածք ունի, քան Իսրայելը, վերջինը չունի նաև այնպիսի ավիացիա, որով հնարավոր է խոշոր ռումբեր նետել, և հետևաբար՝ ԱՄՆ-ի աջակցությունն է պահանջվում Իրանի միջուկային օբյեկտներին հարվածելու որոշման դեպքում։ Եվ քանի որ ԱՄՆ-ում նախագահական ընտրություններ են, նա համոզված է, որ դեմոկրատները մեծ հավանականությամբ՝ թույլ չեն տա Իսրայելին հարվածել Իրանի միջուկային օբյեկտներին։ Սակայն, դատելով նաև արևմտյան մամուլի հրապարակումներից, Չեռնոմորյանը չի բացառում, որ Իսրայելը կարող է հարվածներ հասցնել Իրանի խոշոր ռազմաբազաներին, հատկապես, որ հայտնի են հրթիռային հենակետերի տեղերը։ Հարցազրույցում խոսել ենք նաև այս կոնֆլիկտի քաղաքական հնարավոր լուծումների մասին։

Հարցազրույցն ամբողջությամբ՝ տեսանյութում։

Ռոբերտ Անանյան