21.06.2026 | 19:02
Ջեյ Դի Վենսը հայտնել է Իրանի հետ բանակցություններում առաջընթացի մասին
Ալիևի հատուկ ներկայացուցիչը Ճապոնիայում Բաքվի ու Երևանի միջև խաղաղության գործընթացն է քննարկել
Քաղաքականություն
17.10.2024 | 17:17
Ադրբեջանի և Ճապոնիայի միջև երկկողմ հարաբերությունների իրավիճակն ու զարգացման հեռանկարները, ինչպես նաև Բաքվի ու Երևանի միջև խաղաղության գործընթացն ու առաջիկա COP29 համաժողովն է քննարկել Ադրբեջանի նախագահի հատուկ հանձնարարություններով ներկայացուցիչ Էլչին Ամիրբեկովը Ճապոնիա կատարած աշխատանքային այցի ընթացքում: Այս մասին հայտնել է Ճապոնիայում Ադրբեջանի դեսպան Գյուրսել Իսմայիլզադեն։
Նա մի շարք հանդիպումներ է անցկացրել Ճապոնիայի բարձրաստիճան պաշտոնյաների, այդ թվում՝ ազգային անվտանգության հարցերով խորհրդական Տակեո Ակիբայի, պետքարտուղար, արտաքին գործերի փոխնախարար Կիոտո Ցուջիի հետ, խորհրդարանի արտաքին հարաբերությունների և պաշտպանության հանձնաժողովի ղեկավար Կիմի Օնոդայի հետ։
Միջազգային հարաբերությունների ճապոնական ֆորումում (JFIR) Ամիրբեկովը հանդես է եկել «Խաղաղության պատմական հնարավորություն Հարավային Կովկասում. մարտահրավերներ և հնարավորություններ» թեմայով զեկուցմամբ: Իր ելույթում նա ընդգծել է Ադրբեջանի և Հայաստանի միջև խաղաղ կարգավորման կարևորությունը՝ տարածաշրջանում կայունություն և բարգավաճում ապահովելու համար։
Ուշագրավ է, որ Ամիրբեկովի այցը հաջորդում է ՀՀ ԱԽ քարտուղար Արմեն Գրիգորյանի՝ սեպտեմբերին Ճապոնիա կատարած այցին, որին ուշի ուշով հետևում էին Բաքվում։ Ադրբեջանի իշխանամերձ լրատվամիջոցները նույնիսկ տեղեկություններ էին տարածում, թե Երևանը Տոկիոյի հետ բանակցում է տարբեր զինատեսակների ձեռքբերման շուրջ։
Թարգմանությունը՝ Էմմա Չոբանյանի
