Զելենսկին կրկին Հյուսիսային Կորեային, Իրանին և Չինաստանին մեղադրել է ռուսական ագրեսիային աջակցելու մեջ

Ուկրաինայի նախագահ Վլադիմիր Զելենսկին Գերագույն ռադայում ունեցած ելույթում անդրադարձել է աջակցությունը, որը Ռուսաստանը ստանում է Հյուսիսային Կորեայից, Իրանից և Չինաստանից։ Նա Հյուսիսային Կորեայի մասին խոսել է ամենակոշտ արտահայտություններով։

«Այս պահի դրությամբ Պուտինի հետ հանցագործների կոալիցիան արդեն ներառում է Հյուսիսային Կորեան՝ Կիմ ընտանիքը, որը ստրկության մեջ է պահում ավելի քան քսան միլիոն կորեացիների։ Մեր հետախուզությունն արձանագրում է ոչ միայն Հյուսիսային Կորեայից Ռուսաստան զենքի, այլև մարդկանց տեղափոխումը։ Նրանք աշխատում են ռուսական գործարաններում պատերազմում զոհված ռուսների փոխարեն։ Եվ ռուսական բանակի համար անձնակազմ են»,- ասել է Ուկրաինայի նախագահը։

BBC-ի ռուսական ծառայության փոխանցմամբ՝ Փհենյանը բացահայտորեն քաղաքականապես աջակցում է Մոսկվային, սակայն այս երկրները պաշտոնապես չեն ընդունում զենքի մատակարարումը, առավել ևս՝ մարդկանց տեղափոխումը։ Հյուսիսկորեական զենքի և զինամթերքի մատակարարումը հաստատվել է բազմաթիվ այլընտրանքային աղբյուրներով՝ մարտի դաշտում բացահայտումներով, արևմտյան կառավարությունների զեկույցներում, նույնիսկ Կրեմլին մոտ կանգնած վտարված ռուս լրագրողների միջոցով։

Ինչ վերաբերում է Չինաստանին, Զելենսկին հտյտարարել է․ «Չնայած հայտարարություններին՝ Պեկինը ձեռնպահ է մնում իրապես արդյունավետ քայլեր ձեռնարկելուց՝ կասեցնելու Ռուսաստանի ագրեսիան և ՄԱԿ-ի կանոնադրության խախտումը։ Եվ մենք պետք է ազնվորեն ասենք՝ ուկրաինացիները և մեր բոլոր գործընկերները, եթե հիմա չուժեղանանք, Պուտինը հաջորդ տարի ժամանակ կունենա ամրապնդվելու, որպեսզի ընդմիշտ դեն նետի դիվանագիտությունը»։

Թարգմանությունը՝ Տաթև Ֆռանգյանի