21.02.2026 | 16:59
Պուտինը ստորագրել է ԱԴԾ-ի պահանջով կապի անջատման մասին օրենքը
ՌԴ-ն հետ է գրավել Կուրսկի շրջանում կորցրած տարածքների մեկ քառորդը․ Newsweek
Քաղաքականություն
16.10.2024 | 17:50
Ուկրաինայի զինված ուժերը Կուրսկի շրջանում սկսել են կորցնել դիրքերը ռուսական բանակի ուժեղացված հակահարձակման ֆոնին. ՌԴ-ն արդեն հետ է գրավել օկուպացված սահմանային շրջանների մեկ քառորդը, գրում է Newsweek-ը։
Պարբերականը վերլուծել է բաց աղբյուրների հրապարակումները, որոնք ներկայացնում են ռազմաճակատում տիրող իրավիճակը:
Այսպիսով, ուկրաինական OSINT DeepState նախագիծը տեղադրել է ռազմական գործողությունների քարտեզ, որից հետևում է, որ հոկտեմբերի սկզբից ռուսական զորքերին հաջողվել է գրավել Կուրսկի շրջանի մոտ 120 կմ² տարածք։ Ավելին, դրանցից 65 կմ²-ը ռուսները հետ են գրավել անցած շաբաթավերջին։
Ներկայում Ուկրաինայի զինված ուժերի վերահսկողության տակ է մնում շուրջ 660 կմ², ևս 360 կմ²-ը գորշ գոտի է։ Միևնույն ժամանակ, ըստ վերլուծաբանների, օգոստոսին՝ Կուրսկի շրջանում հարձակման գագաթնակետին, ուկրաինական ուժերին հաջողվել է գրավել շուրջ 900 կմ² տարածք, ևս 330 կմ² եղել է գորշ գոտում։
Ըստ հրապարակման՝ ռուս զինվորականներն ամենամեծ հաջողություններին հասել են Կորենևսկի շրջանում։ «Դվա մայորա» տելեգրամ-ալիքը գրում է, որ ռուսական ուժերին հաջողվել է գրավել Տոլստի Լուգն ու Նովոիվանովկան։ Ըստ Ռիբարի, որը մոտ է Ռուսաստանի պաշտպանության նախարարությանը, բանակը վերականգնել է վերահսկողությունը նաև Օլգովկայի, Պոկրովսկիի, Զելյոնի Շլյախի և Նիժնի Կլինի նկատմամբ։ Բացի այդ, ռուս զինվորականները շրջափակել են Ուկրաինայի զինված ուժերին Լյուբիմովկայի շրջանում։
Այս բնակավայրի, ինչպես նաև Զելյոնի Շլյախի և Նովոիվանովկայի կորուստը հաստատվել է նաև DeepState-ի կողմից։
Միաժամանակ, աղբյուրը պնդում է, որ նշված մյուս գյուղերը դեռ վերահսկվում են Ուկրաինայի կողմից։
Իրավիճակը Կուրսկի շրջանում կարելի է անվանել բարդ, ասել է վերլուծաբան և նախագծի համահիմնադիր Ռոման Պոգորելին Hromadske Radio-ի եթերում։ Նրա խոսքով՝ Ռուսաստանն այնտեղ հավաքել է մինչև 50 հազար զինվորականի՝ մեծ քանակությամբ տեխնիկայով, այդ ռեզերվներն ուղարկվել են մարտի դաշտ։ Նույն տեղեկությունը հայտնել է Ուկրաինայի զինված ուժերի գերագույն գլխավոր հրամանատար Ալեքսանդր Սիրսկին։
Թարգմանությունը՝ Տաթև Ֆռանգյանի
