26.05.2026 | 23:35
Վաղը առավոտյան ՀՀ ԶՈՒ ավիացիան Երևանի կենտրոնում կատարելու է թռիչք. ՊՆ
ԵՄ-ն կարող է ապրել առանց ռուսական գազի․ Էներգետիկայի հարցերով եվրահանձնակատար
Քաղաքականություն
16.10.2024 | 17:10
Էներգետիկայի հարցերով եվրահանձնակատար Կադրի Սիմոնսը հայտարարել է, որ ԵՄ-ն կարող է փոխարինել Ուկրաինայի միջոցով մատակարարվող ռուսական գազը՝ հունվարին պայմանագրի ավարտից հետո: DW-ի ռուսական ծառայության փոխանցմամբ՝ այս մասին նա ասել է Լյուքսեմբուրգում ԵՄ էներգետիկայի նախարարների հետ հանդիպման արդյունքներով կայացած մամուլի ասուլիսում։
«Ես հաստատել եմ նախարարներին, որ մենք պատրաստ ենք Ռուսաստանի և «Նավթոգազի» միջև պայմանագրի ավարտին, կան 14 միլիարդ խորանարդ մետր ռուսական գազի փոխարինման տարբերակներ»,- ասել է նա։
Սիմոնսը հավելել է, որ ռուսական գազի շարունակական օգտագործման համար «ոչ մի արդարացում» չկա։
«ԵՄ-ն կարող է ապրել առանց ռուսական գազի: Ես ուզում եմ հստակ ասել, որ դա [Ռուսաստանի Դաշնությունից գազի օգտագործումը} ոչ թե անհրաժեշտություն է, այլ քաղաքական ընտրություն, ընդ որում՝ վտանգավոր»,- հավելել է նա։
Չնայած Ուկրաինայի դեմ Ռուսաստանի շարունակական պատերազմին՝ ՌԴ-ից գազը շարունակում է հոսել դեպի Եվրոպա Կիևի կողմից վերահսկվող տարածքներով՝ հինգ տարի առաջ ռուսական «Գազպրոմի» և ուկրաինական «Նավթոգազի» միջև կնքված համաձայնագրի պայմանների համաձայն: Համաձայնագրի ժամկետը լրանում է 2024 թվականի դեկտեմբերին։
Հուլիսին գերմանական Handelsblatt տնտեսական պարբերականը գրել էր, որ եվրոպական մի քանի երկրներ աշխատում են Ուկրաինայի տարածքով ռուսական գազի մատակարարումները ԵՄ շարունակելու ուղղությամբ, սակայն օգոստոսի 30-ին Ուկրաինայի նախագահի գրասենյակի ղեկավարի խորհրդական Միխայիլ Պոդոլյակը հայտարարեց, որ Կիևը մտադիր է 2025 թվականի հունվարի 1-ից դադարեցնել գազի մատակարարումը Ռուսաստանի Դաշնությունից դեպի Եվրոպա։
Թարգմանությունը՝ Տաթև Ֆռանգյանի
