26.05.2026 | 23:35
Վաղը առավոտյան ՀՀ ԶՈՒ ավիացիան Երևանի կենտրոնում կատարելու է թռիչք. ՊՆ
Իրանն ու Ադրբեջանը քննարկել են իրանական տարածքով դեպի Նախիջևան երկաթուղու կառուցման հարցը
Քաղաքականություն
15.10.2024 | 15:20
Ադրբեջանն ու Իրանը քննարկել են երկաթուղային գծի կառուցումը, որը ադրբեջանական տարածքը կկապի Նախիջևանի Ինքնավար Հանրապետությանը։ Այս մասին հայտնել է «Ադրբեջանական երկաթուղիներ» ՓԲԸ նախագահ Ռովշան Ռուստամովը, գրում են ադրբեջանական լրատվամիջոցները։
«Իրան կատարած պաշտոնական այցի շրջանակներում մենք հանդիպել ենք այդ երկրի երկաթուղային վարչակազմի ղեկավար Ջաբբար Ալի Զաքերի Սարդրուդիի հետ»,-ասել է Ռուստամովը՝ նշելով, որ քննարկումների թեման եղել է երկաթուղային գծի կառուցումը, որն ուղղակի ցամաքային կապ կապահովի Իրանի տարածքով Նախիջևանի Ինքնավար Հանրապետության հետ։
Ադրբեջանցի պաշտոնյան նաև հայտնել է, որ քննարկել են Հյուսիս-Հարավ միջանցքի երկայնքով համագործակցության ամրապնդման հարցերը և խոսել երկու երթուղիների զարգացման ուղղությամբ «Ադրբեջանական երկաթուղի»-ի ձեռնարկած քայլերի, ինչպես նաև ապագա ծրագրերի մասին»։
Հիշեցնենք, որ 2022 թվականի մարտին Ադրբեջանի և Իրանի կառավարությունները փոխըմբռնման հուշագիր էին ստորագրել՝ ԼՂ-ի տարածքների և Նախիջևանի Ինքնավար Հանրապետության միջև Իրանի տարածքով հաղորդակցության նոր կապեր հաստատելու վերաբերյալ։ Նախորդ տարի հոկտեմբերին էլ այդ հուշագրի շրջանակներում Կովսականի շրջանի Աղբենդ գյուղի մոտ տեղի էր ունեցել Ադրբեջանի և Իրանի միջև ճանապարհային կամրջի և սահմանային-մաքսային ենթակառուցվածքի հիմնարկեքի արարողությունը։
Հիմարկեքի արարողությանը մասնակցել էին Ադրբեջանի փոխվարչապետ Շահին Մուստաֆաևն ու Իրանի այն ժամանակվա ճանապարհների և քաղաքաշինության նախարար Մեհրդատ Բազրփաշը։ Միջոցառմանը նշվել էր, որ ստեղծված ավտոմոբիլային և սահմանամաքսային ենթակառուցվածքները ծառայելու են երկրների տարածքով տարանցիկ բեռնափոխադրումների ավելացմանն ու Նախիջևան մուտքի դյուրացմանը։ Նշվել էր , որ նախատեսվում է երկաթուղային կամրջի կառուցում, և Նախիջևանի հետ կապը ստեղծվելու է Իրանի տարածքով անցնող կամուրջներով։
Էմմա Չոբանյան
