30.04.2026 | 23:18
ՀՀ 4 քաղաքում մթնոլորտային օդում փոշու պարունակությունը գերազանցել է սահմանային թույլատրելի կոնցենտրացիան
Մոսկվայում ավտոմեքենայում ռումբ է պայթել․կան վիրավորներ
Քաղաքականություն
15.10.2024 | 11:58
Մոսկվայի հարավ-արևմուտքում հոկտեմբերի 15-ի առավոտյան պայթյուն է տեղի ունեցել։ Այս մասին հայտնում է ՌԴ Քննչական կոմիտեի քաղաքային վարչությունը։ Մոսկվայի դատախազությունը պարզաբանել է, որ պայթյունը տեղի է ունեցել Պրոֆսոյուզնայա փողոցում, գրում է Meduza-ն։
Ըստ քննության տվյալների՝ պայթյունի հետևանքով վիրավորվել է 3 մարդ, այդ թվում՝ 6-ամյա մի տղա։ Նշվում է, որ տուժածները հոսպիտալացվել են։ Դեպքի վայրում են շտապօգնության և ԱԻՆ մեքենաները։
Baza տելեգրամ ալիքը հայտնել է, որ ինքնաշեն պայթուցիկ սարքը գործի է դրվել ժամը 8:00-ի սահմաններում, երբ ամենագնացի վարորդը փորձել է ռումբը հեռացնել մեքենայի կապոտի վրայից։ Դեպքի ականատեսներից մեկը Shot տելեգրամ ալիքին պատմել է, որ վարորդը փորձել է կապոտից հեռացնել փաթեթը, որը ծածկված է եղել մանկական բարուրով։ Պայթյունի հետևանքով վարորդի ձեռքն անդամահատվել է, նա վիրավորվել է նաև ոտքից։ Երկրորդ վիրավոր տղամարդը ազդրի բեկորային վնասվածք է ստացել, իսկ երեխան՝ գլխի կտրվածք։
Ռուսական տելեգրամ ալիքները հայտնում են, որ մեքենան պատկանում է 44-ամյա գործարար Վիկտոր Միշաչևին։ Նա ռեստորանների ցանց շահագործող «Շեյքեր գրուպ» ընկերության հիմնադիրն ու ղեկավարն է։ ՌԴ Քննչական կոմիտեն քրեական գործ է հարուցել երկու և ավելի անձանց սպանության փորձի հոդվածով։
Թարգմանությունը՝ Էմմա Չոբանյանի
