Շոլցը հրաժարվել է ծանր տեխնիկա մատակարարել Ուկրաինային

Գերմանիան այլևս մտադիր չէ ծանր զինտեխնիկա ուղարկել Ուկրաինա, Bild-ին հայտնել են իրազեկ աղբյուրները։ Ըստ պարբերականի՝ Գերմանիայի պաշտպանության նախարարությունը կարծում է, որ Ուկրաինան մոտ ապագայում չի կարողանա հակահարձակում ձեռնարկել իր տարածքներն ազատագրելու համար։

Բունդեսվերը մտադիր չէ նոր ծանր տեխնիկա մատակարարել Կիևին, ասվում է Bild-ին հասանելի դարձած փաստաթղթում։ Վերջին 18 Leopard-2 տանկերի մատակարարումից հետո հետագա մատակարարումներ չեն նախատեսվում, թեև գերմանական բանակն ունի շուրջ 300 այդպիսի տանկ։ Նույնը վերաբերում է տեխնիկայի այլ տեսակներին՝ հետևակի մարտական մեքենաներին, զրահափոխադրիչներին և հաուբիցներին։

Պարբերականի տվյալներով՝ ռազմական օգնության նոր փաթեթը, որի մասին Բեռլինը հայտարարել է ուրբաթ, արդեն խոստացվել է Կիևին և ֆինանսավորվել անցյալ տարի։

Իրավիճակին ծանոթ աղբյուրները պարզաբանել են, որ Ուկրաինայի նախագահ Վլադիմիր Զելենսկին հոկտեմբերի 11-ին Գերմանիայի կանցլեր Օլաֆ Շոլցի հետ հանդիպման ժամանակ թույլտվություն է խնդրել օգտագործել հեռահար Taurus-ները ռուսական տարածքի վրա հարձակումների համար և հաստատել Ուկրաինայի արագացված անդամակցությունը ՆԱՏՕ-ին։ Ըստ պարբերականի՝ Ուկրաինայի նախագահի այս խնդրանքներն Բեռլինում սառնորեն են ընդունվել։ Շոլցը հստակ «ոչ» չի ասել, բայց ոչ էլ դրական պատասխան է տվել։

Մյունխենի Բունդեսվերի համալսարանի միջազգային քաղաքականության պրոֆեսոր, քաղաքագետ Կառլո Մասալան ասել է, որ Զելենսկիի եվրոպական շրջագայությունն անհաջող էր։

«Զելենսկին իր հաղթական ծրագրի երկու առանցքային կետերում առաջընթաց չի գրանցել։ Ուստի, Ուկրաինայի տեսանկյունից, եվրոպական շրջագայությունն անհաջող էր»,- ասել է Մասալան։

Թարգմանությունը՝ Տաթև Ֆռանգյանի