08.10.2026 | 18:02
Փարիզում քննարկվել է ապաստանի գործերով մասնագիտացված դատավորներ ունենալու հնարավորությունը
Չինաստանը զորավարժություններ է սկսել Թայվանի մոտ
Քաղաքականություն
14.10.2024 | 13:28
Չինաստանը կրկին լայնածավալ զորավարժություններ է անցկացնում Թայվանի մոտ։ Joint-Sword-2024B անվանումը ստացած զորավարժությունները կանցկացվեն Թայվանի նեղուցում և Թայվանից հյուսիս, հարավ և արևելք շրջաններում, հաղորդել է Reuters-ը՝ վկայակոչելով Չինաստանի Արևելյան հրամանատարությանը:
Որպես զորավարժությունների նպատակ նշվում է համատեղ գրոհը, կղզու գլխավոր նավահանգիստների ու շրջանների արգելափակումն ու վերահսկողության տակ վերցնելը։
«Զորավարժությունները նաև խիստ նախազգուշացում են Թայվանի անկախության ուժերի անջատողական գործունեության դեմ: Սա օրինական և անհրաժեշտ միջոց է [Չինաստանի] ինքնիշխանությունն ու ազգային միասնությունը պաշտպանելու համար»,- ասվում է Չինաստանի զինվորականների հայտարարության մեջ:
ՌԻԱ Նովոստիի փոխանցմամբ՝ «Լյաոնինգ» ավիակրի գլխավորած ավիակիրների խումբը ներգրավված է Չինաստանի Ժողովրդական ազատագրական բանակի (PLA) լայնածավալ զորավարժություններում Թայվանից արևելք։
Ռազմական վարժանքների ավարտի ժամկետն այս անգամ չի հայտարարվել, նշում է Reuters-ը։
Թայվանի Պաշտպանության նախարարությունն արդեն դատապարտել է Չինաստանի «ոչ ռացիոնալ և սադրիչ գործողությունները» և հայտարարել սեփական զինված ուժերի տեղակայման մասին՝ կապված չինական զորքերի կողմից կղզու վիրտուալ շրջապատման հետ։
Կղզին բարձր զգոնության մեջ է անցած շաբաթվա Ազգային օրվա տոնակատարությունների ժամանակ նախագահ Լայ Ցինդեի ելույթից հետո, որի ժամանակ նա շեշտել է, որ Պեկինն իրավունք չունի ներկայացնելու Թայվանը: Նրա ելույթը դատապարտել են Չինաստանի իշխանությունները։
Թարգմանությունը՝ Տաթև Ֆռանգյանի
