Թրամփի հանրահավաքի վայրի մոտ զինված տղամարդ է ձերբակալվել

Կալիֆորնիայում Հանրապետական կուսակցությունից ԱՄՆ նախագահի ​​թեկնածու Դոնալդ Թրամփի ելույթից առաջ ոստիկանությունը ձերբակալել է զինված տղամարդու, որը փորձել է հանրահավաքի վայր մտնել «ինքնաշեն» համարանիշներով ավտոմեքենայով, գրում է Current time-ը։

Շրջանի ոստիկանապետը տեղի ունեցածն անվանել է «ենթադրաբար մահափորձի կանխում», փոխանցում է Southern California News Group-ը։

Los Angeles Times-ի հաղորդմամբ էլ՝ Լաս Վեգասի 49-ամյա բնակիչ Վեմ Միլլերը ձերբակալվել է Թրամփի ելույթից մեկ ժամ առաջ՝ հանրահավաքի մոտ տեղադրված անցկակետերից մեկում։ Միլլերի մոտ հայտնաբերել են որսորդական հրացան և ատրճանակ։ Զենքը լիցքավորված է եղել, կասկածյալից առգրավվել է պահունակը։

Ոստիկանապետ Չադ Բյանկոն ասել է, որ ձերբակալության ժամանակ Միլլերը ներկայացրել է Թրամփի հետ հանդիպման կեղծ VIP հրավեր և մամուլի աշխատակցի վկայական։ Նրա խոսքով՝ կասկածյալը գրանցված հանրապետական ​​է, որը մասնակցել է Նևադայի օրենսդիր մարմնի ստորին պալատի ընտրություններին 2022 թվականին։ Ենթադրվում է, որ Միլլերն աջակողմյան հակակառավարական խմբավորման անդամ է։

Տղամարդը ձերբակալվել է ապօրինի զենք-զինամթերք պահելու մեղադրանքով, իսկ ավելի ուշ ազատ է արձակվել 5 հազար դոլար գրավի դիմաց: Նրա գործով դատական ​​նիստը նշանակված է հաջորդ տարվա հունվարի 2-ին։

Նշենք, որ այս նախընտրական քարոզարշավի ընթացքում Դոնալդ Թրամփի դեմ արդեն երկու մահափորձ է կատարվել։ Հուլիսի 13-ին Փենսիլվանիայում նախընտրական հանրահավաքի ժամանակ կրակ էին բացել հանրապետական թեկնածուի ուղղությամբ։ Կրակողը սպանել էր հանրահավաքի մասնակիցներից մեկին, երեք մարդ վիրավորվել էր։ Փամփուշտներից մեկը վնասել էր Թրամփի ականջը։ Կասկածյալը՝ 20-ամյա Թոմաս Մեթյու Քրուքսը, սպանվել էր դեպքի վայրում։

Սեպտեմբերի 15-ին էլ 58-ամյա Ռայան Ուեսլի Ռութին նկատել էին գոլֆի դաշտում, որտեղ խաղում էր Թրամփը։ Նրա անվտանգության աշխատակիցը կրակ էր բացել կասկածյալի վրա։ Վերջինը փորձել էր փախչել, սակայն ձերբակալվել էր։

Թարգմանությունը՝ Էմմա Չոբանյանի