30.04.2026 | 23:18
ՀՀ 4 քաղաքում մթնոլորտային օդում փոշու պարունակությունը գերազանցել է սահմանային թույլատրելի կոնցենտրացիան
«Հըզբոլլահ»-ը ԱԹՍ-ներով գրոհել է իսրայելական բազան․ չորս զինվոր է զոհվել․ ՏԵՍԱՆՅՈՒԹ
Քաղաքականություն
14.10.2024 | 12:43
Իսրայելի հյուսիսում գտնվող ռազմաբազային անօդաչու թռչող սարքի հարձակման հետևանքով չորս իսրայելցի զինվոր է զոհվել, ևս 60-ը վիրավորվել է։ BBC-ի ռուսական ծառայության փոխանցմամբ՝ այս մասին հայտնել են զինվորականները:
Իսրայելի պաշտպանության բանակի տվյալներով՝ յոթ զինվոր լրջորեն վիրավորվել է բազայի վրա հարձակման հետևանքով, որը գտնվում է Հայֆայից հարավ գտնվող Բենիամին Գիվատ Ադա գյուղում։
Magen David Adom (MDA) բժշկական ծառայությունն ավելի վաղ հայտնել էր, որ հարձակման հետևանքով վիրավորվել է 61 մարդ։ 37-ը շտապօգնության մեքենաներով և ուղղաթիռով տեղափոխվել են տարբեր հիվանդանոցներ։
Հարձակման պատասխանատվությունը ստանձնել է լիբանանյան «Հըզբոլլահ»-ը։ Խմբավորման մամուլի ծառայությունը հայտարարել է, որ հարվածը հասցվել է՝ ի պատասխան հինգշաբթի հարավային Լիբանանում և Բեյրութում Իսրայելի հարձակումների։ Խմբավորման տեղեկացմամբ՝ բազան հարձակման է ենթարկվել «անօդաչու թռչող սարքերի խմբի կողմից»։
Դատելով դեպքի վայրից հրապարակված կադրերից՝ զինծառայողները հարվածի պահին եղել են ճաշարանում։ Սոցցանցերում շրջանառվող նկարներում պատկերված է դատարկ ճաշարանը՝ տանիքին անցքով:
Թարգմանությունը՝ Տաթև Ֆռանգյանի
