18.07.2026 | 22:57
Երևանի Մուրացանի փողոցում տեղի ունեցած միջադեպի վայրում դի է հայտնաբերվել
Ռուսական բանակը Կուրսկի շրջանում ամենախոշոր հակահարձակումն է իրականացրել Ուկրաինայի ԶՈՒ-ի ներխուժումից ի վեր. The Moscow Times
Քաղաքականություն
11.10.2024 | 22:10
Ըստ ռազմական թղթակիցների և ուկրաինական OSINT-ի վերլուծաբանների՝ ռուսական զորքերը Կուրսկի շրջանում ամենամեծ հակահարձակումն են իրականացրել ուկրաինական ուժերի ներխուժումից ի վեր՝ թափանցելով ուկրաինական զինված ուժերի դիրքերը մի քանի կիլոմետր խորության վրա, գրում է The Moscow Times-ը:
Ռուսական բանակի հակահարձակումը տեղի է ունեցել հոկտեմբերի 10-ին և ազդել է Կուրսկի շրջանի Սուջանի և Կորենևի շրջանների վրա, որոնց ուղղությամբ Ուկրաինայի զինված ուժերը հարձակվել էին օգոստոսի սկզբին՝ գրավելով մոտ 1000 քառակուսի կմ տարածք։
Պաշտպանության նախարարությանը մոտ գտնվող «Ռիբար» տելեգրամ-ալիքը գրում է, որ ռուսական բանակը ճեղքել է ուկրաինական զինված ուժերի պաշտպանությունը Լյուբիմովկա գյուղի տարածքում, որից հետո ռուսական զորքերին հաջողվել է շրջապատել ուկրաինական բանակի երկու գումարտակ։
«Ռիբար»-ի տվյալներով՝ Ուկրաինայի ԶՈՒ-ն լրացուցիչ ուժեր է տեղափոխում Սուջանի ուղղությամբ։ Իսկ ռուսական բանակը շարունակում է առաջխաղացումը Կորենևսկի շրջանում, մարտեր են ընթանում Զելյոնիյ Շլյախ ագարակի տարածքում, գրում է «Դվա մայորա» տելեգրամ-ալիքը։
Ուկրաինական OSINT DeepState նախագծի վերլուծաբանները հաստատում են այս տվյալները։ Նրանց տեղեկություններով՝ ռուսական զորքերն ուկրաինական ուժերի «Կուրսկի» խմբավորման ձախ թևով առաջ են անցել։
Վերլուծաբանները նշում են, որ ռուսական զորքերը կարողացել են թափանցել շուրջ յոթ կիլոմետր դեպի խորք։
Ուկրաինայի Զինված ուժերի գլխավոր հրամանատար Ալեքսանդր Սիրսկին հայտնել է, որ ռուսական բանակն այլ ռազմաճակատներից Կուրսկի շրջան է տեղափոխել շուրջ 50 հազար զինվորականի։
Թարգմանությունը՝ Տաթև Ֆռանգյանի
