Քաղաքականություն
11.10.2024 | 13:47
Եվրամիությունը սառեցրել է Վրաստանին տրամադրվող ընդհանուր 121,3 միլիոն եվրոյի չափով օգնությունը՝ ժողովրդավարական հետընթացի պատճառով: Այս մասին են վկայում Եվրահանձնաժողովի Հարևանության քաղաքականության և ընդլայնման բանակցությունների գլխավոր տնօրինության հրապարակած տվյալները։
Դրանց համաձայն՝ ԵՄ-ն դադարեցրել է 2022 թվականից Վրաստանին 12 միլիոն եվրոյի, 2023 թվականից՝ 72 միլիոն եվրոյի, 2024 թվականից՝ 37,3 միլիոն եվրոյի հատկացումը (տարբեր տարիների գումարներ, քանի որ հատկացումը չի կատարվում նույն տարում, երբ որոշումը կայացվում է):
Այդ միջոցները կասեցվել են՝ «ի պատասխան ժողովրդավարական չափանիշների հետաձգման», մասնավորապես, «Օտարերկրյա ազդեցության թափանցիկության մասին» օրենքի ընդունումից հետո, որի թիրախը Վրաստանի հասարակական կազմակերպություններն ու լրատվամիջոցներն են, ասվում է հայտարարության մեջ:
ԵՄ առաջնորդներն ավելի վաղ հայտարարել էին, որ «օտարերկրյա գործակալների» մասին օրենքի ընդունումը փաստացի կասեցնում է Վրաստանի եվրաինտեգրման գործընթացը։
Թարգմանությունը՝ Տաթև Ֆռանգյանի
