15.03.2026 | 15:45
Սլովակիան հանել է Ռուսաստանի դեմ ԵՄ պատժամիջոցների արգելափակումը
ՆԱՏՕ-ն հայտարարել է Եվրոպայում ամենամյա միջուկային զորավարժությունների մեկնարկի մասին
Քաղաքականություն
11.10.2024 | 13:28
Հոկտեմբերի 14-ին մեկնարկելու են ՆԱՏՕ-ի՝ տարածքը միջուկային հարձակումից պաշտպանելուն ուղղված ամենամյա զորավարժությունները՝ Steadfast Noon-ը: Այս մասին հայտարարել է ՆԱՏՕ-ի գլխավոր քարտուղար Մարկ Ռյուտեն, գրում է DW-ի ռուսական ծառայությունը։
Նա նշել է, որ զորավարժություններում ներգրավվելու է ավելի քան 60 ինքնաթիռ։ Վարժանքները տեղի են ունենալու Հյուսիսային ծովում՝ Մեծ Բրիտանիայի, Բելգիայի և Նիդերլանդների օդային տարածքում։
«Անկայուն աշխարհում չափազանց կարևոր է, որ մենք ստուգենք ու ամրապնդենք մեր պաշտպանությունը, որ հակառակորդներն իմանան՝ ՆԱՏՕ-ն պատրաստ է և ունակ պատասխանելու ցանկացած սպառնալիքի»,- ասել է Ռյուտեն։
Հյուսիսատլանտյան դաշինքի ղեկավարը նաև ընդգծել է, որ այս զորավարժություններն արձագանք չեն Ուկրաինայի դեմ Ռուսաստանի ագրեսիվ պատերազմի։
Զորավարժությունների սցենարի վերաբերյալ մանրամասներ չեն հաղորդվում, սակայն ռազմական փորձագետների տվյալներով՝ դրանց ընթացքում փորձարկում են ստորգետնյա պահեստարաններից ամերիկյան միջուկային զենքի անվտանգ տեղափոխումը և դրանց տեղադրումը ինքնաթիռներում։ Ուսումնական թռիչքները, սակայն, իրականացվում են առանց իրական զենքի կիրառման։
ՆԱՏՕ-ի միջուկային զենքի համատեղ օգտագործման ծրագիրը նախատեսում է, որ Եվրոպայում տեղակայված ամերիկյան միջուկային զենքերը կարող են հակառակորդի թիրախներին ուղղվել գործընկեր երկրների ինքնաթիռներից արտակարգ իրավիճակներում:
Պաշտոնապես չհաստատված տեղեկություններով՝ այն պահվում է հյուսիսային Իտալիայում, Թուրքիայում, Բելգիայում, Նիդերլանդներում, ինչպես նաև Գերմանիայի Ռեյնլանդ-Պֆալց դաշնային նահանգի Բյուխել բազայում։
Թարգմանությունը՝ Էմմա Չոբանյանի
