Ներկայումս գործող դատավորները շարունակում են մնալ նույն վախեցածները, դրա պատասխանատուն այս իշխանությունը չէ, այլ՝ աղմուկ բարձրացնողներն են․ Պարգև Օհանյան․ ՏԵՍԱՆՅՈՒԹ

Ներկայումս գործող դատավորները շարունակում են մնալ այն նույն վախեցածները, դրա պատասխանատուն այս իշխանությունը չէ, այլ՝ աղմուկ բարձրացնողներն են։ Հենց նրանք են դատավորներին դրել այն վիճակի մեջ, որ դատավորներն ինքնուրույն որոշումներ կայացնելու ունակ չեն, այդ հիմքերը դեռ նախկին իշխանության ժամանակ են դրվել, ըստ որի,  պետք է անպայման «դաբրո» ստանան։

Այս մասին այսօր Factor.am-ի հետ զրույցում ասաց նախկին դատավոր, այժմ գործող փաստաբան Պարգև Օհանյանը՝ անդրադառնալով ԱԱԾ տնօրենի և ՀՔԾ պետի հեռախոսազրույցի գաղտնալսմանն ու հրապարակմանը։ 

«Հեռախոսային խոսակցության մեջ դատավորի՝ ԱԱԾ պետին զանգելու դրվագը խոսում է այն մասին, որ սա քաղաքական պատվեր չէր, եթե պատվեր լիներ, էլ ինչո՞ւ էր զանգում, իրեն պետք է զանգած լինեին»,-ասաց նա՝ շեշտելով, որ իր դատավոր աշխատած տարիներին եղել են գործեր, որոնց վերաբերյալ ինքն էլ է խորհրդակցել  ուժային կառույցների հետ։ 

Պարգև Օհանյանը շեշտեց, որ նախաքննությունը պետք է նախ պարզի, թե այս ձայնագրությունն ու՞մ էր ձեռնտու։

«Ենթադրություններ չեմ սիրում անել՝ հուսանք կպարզվի՝ ո՞վ է գաղտնալսել, երբ է դա արվել և ու՞մ է դա ձեռնտու»,-ասաց նա։ 

Նախկին դատավորը շեշտեց՝  ստեղծված իրավիճակը թեև հեշտ վերահսկելիներից չէ, սակայն անհնար էլ չէ իրավիճակը կառավարելը։

«Հեշտ չէ, քանի որ մենք մի քիչ թույլ ենք տեխնիկական հագեցվածության առումով, թույլ ենք նաև քանի որ հազար ու մի խանգարողներ, սադրանքի գնացողներ կան։ Ցավով եմ արձանագրում, որ այս ամեն ինչը վերածվում է նաև սև և սպիտակի։ Կարծում եմ, որ ժողովուրդը պետք է փառք տա Աստծուն, որ իր ներկայացուցիչն այդպիսի արդարամտություն, ազնվություն և դուխ ունի»,-նշեց մեր զրուցակիցը։

Մանրամասները՝ տեսանյութում։ 

Աղավնի Սուքիասյան