Քաղաքականություն
10.10.2024 | 20:50
Մոտ ապագայում խաղաղության համաձայնագրի նախագծի անավարտ տեքստը ստորագրելու՝ Հայաստանի համառ առաջարկները միջազգային հանրության աչքերին «թոզ փչելու և նրա իրական մտադրությունները թաքցնելու փորձ են»։ Ադրբեջանական լրատվամիջոցների հաղորդմամբ՝ այս մասին հայտարարել է Ադրբեջանի նախագահ Իլհամ Ալիևի նախագահի հատուկ հանձնարարությունների գծով ներկայացուցիչ Էլչին Ամիրբեկովը TV Berlin-ին տված հարցազրույցում։
Նա ասել է, թե, իբր, «առանց Ադրբեջանի ինքնիշխան տարածքի նկատմամբ Հայաստանի շարունակական տարածքային պահանջների արդյունավետ և հրատապ լուծման, որն առաջին հերթին արտացոլված է ՀՀ գործող Սահմանադրության մեջ, անհնար կլինի վերացնել հայ-ադրբեջանական առճակատման առանցքային պատճառը»։
«Ըստ այդմ, անհնարին կլինի հասնել տևական, վստահելի և անշրջելի խաղաղության երկու երկրների միջև: Այսպիսով, գնդակն այսօր հայկական կողմում է, և մենք հույս ունենք, որ Հայաստանը բաց չի թողնի պատմական հնարավորությունը՝ մեկընդմիշտ շրջելու մեր հարաբերությունների ողբերգական էջը։ Ադրբեջանի համար ակնհայտորեն անիրատեսական, հետևաբար՝ անընդունելի առաջարկներ ներկայացնելը մի կողմից բանակցային գործընթացը ձգձգելու և ժամանակ շահելու փորձ է, մյուս կողմից՝ բոլորի կողմից ակնկալվող արդյունքի բացակայության պատասխանատվությունն Ադրբեջանի ուսերին գցելու բավականին պարզունակ փորձ։ Եթե սրան գումարենք Հայաստանի կողմից իր դաշնակիցների ու հովանավորների օգնությամբ ակտիվորեն վարվող ռազմականացման կուրսը, ինչպես նաև դիվանագիտական առճակատման շարունակումը միջազգային տարբեր հարթակներում, ապա ակնհայտ է դառնում, որ Հայաստանն իրականում արհեստականորեն ձգձգում է կարգավորման գործընթացը, և դրա ավարտը հայկական կողմի համար առաջնային չէ»,- ասել է Ամիրբեկովը։
Ռազմական հզորացումը թիվ մեկ առաջանահերթություն հռչակացած երկրի պաշտոնյան նաև դժգոհել է, որ «վերջերս արագացված տնտեսական, դիվանագիտական, ֆինանսական և ռազմական աջակցությամբ Հայաստանը, մի կողմից, արդեն մղվել է յուրատեսակ «հարմարավետության գոտի», և դա զրկել է նրան բանակցային գործընթացին լուրջ մասնակցությունը շարունակելու ցանկացած դրդապատճառից»։
Թարգմանությունը՝ Էմմա Չոբանյանի
