26.05.2026 | 23:35
Վաղը առավոտյան ՀՀ ԶՈՒ ավիացիան Երևանի կենտրոնում կատարելու է թռիչք. ՊՆ
Կադիրովն արյան վրեժով է սպառնացել Պետդումայի երկու պատգամավորների և սենատորի նկատմամբ՝ Wildberries-ի պատճառով
Քաղաքականություն
10.10.2024 | 17:10
Չեչնիայի ղեկավար Ռամզան Կադիրովն արյան վրեժով է սպառնացել Պետդումայի պատգամավորներ Բեխան Բարախոևին, Ռիզվան Կուրբանովին, ինչպես նաև սենատոր Սուլեյման Քերիմովին։ Կադիրովը պնդում է, որ նրանք ավելի վաղ պատվիրել են իր սպանությունը Wildberries ընկերության շուրջ կոնֆլիկտի պատճառով, փոխանցում է The Moscow Times-ը։
«Նրանք ունեն իրենց բիզնեսները, և ոչ միայն խլել են այս կնոջ [Տատյանա Կիմի] բիզնեսը, այլ նույնիսկ հրամայել են սպանել ինձ»,- ասել է Կադիրովը Չեչնիայում հանրապետության անվտանգության ուժերի հետ հանդիպման ժամանակ:
Նա պնդում է նաև, որ Քերիմովը 100 մլն է առաջարկել իրեն ոչնչացնելու համար (նա չի նշել արժույթը)։
Կադիրովը հավելել է՝ արյան վրեժ է հայտարարում այդ անձանց նկատմամբ, սակայն պատրաստ է դադարեցնել այն, եթե նրանք ապացուցեն իրենց անմեղությունը և հերքեն մեղադրանքները։
Հիշեցնենք, որ Wildberries-ը հունիսի կեսերին հայտարարեց արտաքին գովազդի օպերատոր Russ-ի հետ միաձուլման մասին: Կարճ ժամանակ անց Կադիրովը հայտարարեց, որ հարթակի հիմնադիր Տատյանա Կիմի ամուսինը՝ Վլադիսլավ Բակալչուկը, օգնության խնդրանքով դիմել է իրեն՝ ընտանիքում և բիզնեսում «լուրջ խնդիրների» պատճառով։ Չեչնիայի ղեկավարի խոսքով՝ խոսքն ընկերության «լկտի ռեյդերային տիրանալու» մասին է։ Բակալչուկը պնդում էր, որ իր կինն աշխատում էր մի ընկերության հետ, որը փորձում էր «փակել բիզնեսը» միաձուլման անվան տակ:
Ի պատասխան՝ Կիմը հայտարարել է ամուսնուց բաժանվելու մասին և ընդգծել, որ Russ-ի հետ միաձուլումը նախապես համաձայնեցված է եղել նրա հետ։ Տատյանա Կիմը նաև նշել է, որ Վլադիսլավ Բակալչուկին պատկանում է Wildberries-ի բաժնետոմսերի միայն 1%-ը, և նա չի մասնակցում ընկերության կառավարմանը։ Հոկտեմբերի 1-ին Տատյանա Կիմը հաստատել է գործարքի ավարտը, որի արդյունքում նրա կարողությունը գրեթե կրկնակի կրճատվել է՝ 7,9 միլիարդ դոլարից հասնելով 4,1 միլիարդ դոլարի։
Forbes-ի աղբյուրների համաձայն՝ Տատյանա Կիմը համաձայնել է միաձուլվել Russ-ի հետ 2024 թվականի հունվարին Wildberries պահեստում բռնկված հրդեհից հետո՝ վախենալով իշխանությունների հետ խնդիրներից։ Ռուսաստանի ներկայացուցիչները, իբր, օգնել են լուծել այս հարցը «ամենաբարձր մակարդակով»՝ բիզնեսում մասնաբաժնի դիմաց:
Թարգմանությունը՝ Տաթև Ֆռանգյանի
