07.10.2026 | 16:20
Հայաստանի Կիոկուշին կարատեի ֆեդերացիան կանցկացնի «Սամուրայ» մրցաշարը
Թուրքիայի 5 նահանգներում արգելվել են բողոքի ցույցերը՝ քրդամետ կուսակցության հայտարարած հանրահավաքին ընդառաջ
Քաղաքականություն
10.10.2024 | 18:18
Թուրքիայի առնվազն 5 նահանգների իշխանություններն արգելել են բոլոր բողոքի ցույցերն ու միջոցառումները՝ քրդամետ Ժողովուրդների հավասարություն և ժողովրդավարություն (DEM) կուսակցության կողմից նախատեսվող «Ազատության հանրահավաքներին» ընդառաջ։
Դիարբեքիրի նահանգապետը հոկտեմբերի 8-ին հայտարարել է, որ հոկտեմբերի 9-13-ը հինգ օրով արգելվել են բաց տարածքներում բոլոր բողոքի ակցիաները։
«Հաստատվել է, որ հոկտեմբերի 9-ից, ի պատասխան ահաբեկչական PKK կազմակերպության կոչերի, մեր նահանգում ահաբեկչությանը համակրող կառույցների կողմից կարող են իրականացվել լայնածավալ անօրինական գործողություններ։ Հնարավոր են սադրիչ գործողություններ՝ ուղղված մեր ազգային միասնությունն ու համերաշխությունը խարխլելուն, ինչը կհանգեցնի հանրահավաքի ընթացքում հասարակական կարգի և անվտանգության լուրջ խախտումների»,- ասվում է հայտարարության մեջ։
Քուրդիստանի աշխատավորական կուսակցության (PKK) առաջնորդ Աբդուլլահ Օջալանը Սիրիայից արտաքսվել է 1998 թվականի հոկտեմբերի 9-ին և կալանավորվել թուրքական իշխանությունների կողմից 1999 թվականին։ DEM կուսակցությունը «Հոկտեմբերի 9»-ը համարում է «միջազգային դավադրության» օր։ Կուսակցությունը հայտարարել է, որ հոկտեմբերի 13-ին Դիարբեքիրում հանրահավաք է կազմակերպելու «Խաղաղություն ընդդեմ պատերազմի, ազատություն ընդդեմ մեկուսացման. մենք դեմ ենք դավադրությանը» կարգախոսներով։
Նույն հիմնավորմամբ նահանգապետերը հոկտեմբերի 9-13-ը բողոքի արգելքներ են սահմանել Վանում, հոկտեմբերի 10-14-ը՝ Մարդինում և հոկտեմբերի 10-13-ը՝ Հաքքարիում:
Բաթմանի նահանգապետը ևս հայտարարել է, որ բոլոր բողոքի ակցիաներն ու միջոցառումները նահանգում արգելվել են մինչև հոկտեմբերի 13-ը:
Թարգմանությունը՝ Էմմա Չոբանյանի
