Ադրբեջանը 4,7 միլիոն դոլարի պայմանագիր է կնքել ամերիկյան PR ընկերության հետ՝ COP29-ից առաջ երկրի իմիջը բարելավելու համար

Ադրբեջանի կառավարությունը 4,7 միլիոն դոլար արժողությամբ պայմանագիր է կնքել ամերիկյան Teneo Strategy ընկերության հետ՝ բարելավելու երկրի հանրային իմիջը COP29-ից առաջ, որը տեղի է ունենալու նոյեմբերին Բաքվում՝ շարունակվող քաղաքական ձերբակալությունների և ազատ լրատվամիջոցների դեմ ճնշումների ֆոնին:

Պայմանագրի մանրամասները բացահայտել է ԱՄՆ-ում գործող Quincy Institute for Responsible Statecraft-ի առցանց ամսագրի՝ Responsible Statecraft-ի կողմից, գրում է ադրբեջանական ընդդիմադիր Mikroskop media-ն։

Օտարերկրյա գործակալների գրանցման օրենքի (FARA) համաձայն՝ Teneo Strategyի-ին վարձվել է COP29 օպերացիոն ընկերության նախագահ և գործադիր տնօրեն Նարմին Ջարչալովայի կողմից՝ կատարելու հետևյալ առաջադրանքները. ստեղծել հաղորդակցությունների գործառույթ COP29-ի համար; նարատիվներ զարգացնել; պլանավորել հաղորդակցության և ներգրավման արշավները; կառավարել հասարակայնության հետ կապերի հետ կապված խնդիրները; նպաստել կազմակերպչական զարգացմանը; կառուցել լրատվամիջոցների հետ հարաբերություններ; իրականացնել մեդիա դասընթացներ; իրականացնել հարցումներ և հետազոտություններ։

Նշվում է, որ Շուշիում 2-րդ Գլոբալ մեդիա ֆորումի ընթացքում ընկերությունը շքեղ ընթրիք է կազմակերպել «Ղարաբաղ» 5 աստղանի հյուրանոցի ռեստորանում երեք լրագրողների համար: Հաջորդ առավոտյան The Pakistan Daily-ում հրապարակվել է մի հոդված, որը գովաբանում է Ղարաբաղի նկատմամբ Ադրբեջանի լիակատար վերահսկողությունը։ Հեղինակը՝ Համզա Ազհար Սալամը, շարունակել է նախագահ Իլհամ Ալիևի մասին թվիթերի շարքը՝ X-ում թվարկելով ինը դրական հատկություններ։ Այդ գրառումից հետո CBC Ադրբեջանի կողմից տարածվել է ռեպորտաժ, որը ներառում է հարցազրույց լրագրողի հետ։

Բացի այդ, Teneo Strategy-ն շուրջ 500 անգամ կապ է հաստատել 88 լրատվամիջոցների 144 լրագրողների հետ՝ առաջ մղելու Ադրբեջանի COP29-ի օրակարգը, որը ներառում է միջոցառումը որպես խաղաղության նախաձեռնություն ներկայացնելը:

Ըստ Responsible Statecraft-ի՝ Teneo-ի հինգ ղեկավարներ ներկայում գտնվում են Բաքվում, որոնց թռիչքների և բնակեցման համար արդեն ծախսվել է 350,000 դոլար։ ԱՄՆ պաշտոնյաները նույնպես շահել են Ադրբեջանի «առատաձեռնությունից»:

Մայիսին ԱՄՆ Մեյն նահանգի օրենսդիրներն 9 օր անցկացրել են Ադրբեջանում, նրանց ճանապարհածախսը, սնունդը և կացարանն ապահովվել է Ադրբեջանի Սփյուռքի հետ աշխատանքի պետական ​​կոմիտեի կողմից: Նրանց երթուղու մի մասը ներառել է երկօրյա ճեպազրույց Ղարաբաղում՝ «օկուպացիայից ազատագրման» թեմայով:

Ըստ հրապարակման՝ Teneo Strategy-ն հարմար ընկերություն է իմիջը COP29-ից առաջ մաքրելու համար, որը հյուրընկալելու է  Ադրբեջանը: Ընկերությունը նախկինում աշխատել է Արաբական Միացյալ Էմիրությունների հետ՝ օգնելու վերականգնել իր խաթարված իմիջը COP28-ից առաջ՝ մարդու իրավունքների և շրջակա միջավայրի ոտնահարման վերաբերյալ քննադատությունից հետո: Teneo-ի հետ պայմանագիրը կնքվել է վերջին պահին, որի աշխատանքի դիմաց ընկերությունը վաստակել է 1,5 մլն դոլար։

Բաքու կատարած մամուլի շրջագայության ժամանակ ընկերության ներկայացուցիչները հանդիպել են Arab Gulf Business Insight-ի (AGBI) գլխավոր խմբագիր Ֆրենկ Քեյնի հետ: Այս հանդիպումից հետո Քեյնն ասել է, որ COP29-ի կազմակերպիչները պետք է պատրաստ լինեն աննախադեպ անտեղյակության և նախապաշարմունքների՝ նշելով. «Նրանք կհարձակվեն ձեզ վրա ենթադրյալ կոռուպցիայի, մարդու իրավունքների և աշխարհաքաղաքականության պատճառով՝ ադրբեջանական ագրեսիայի առասպելով»։

Երեք օր անց հնդկական The Hindu ազդեցիկ պարբերականը հրապարակել է հոդված «Կլիմայի համաժողով նոյեմբերին՝ ընդգծելու «խաղաղությունը» և «հրադադարը»» վերնագրով։

Թարգմանությունը՝ Էմմա Չոբանյանի