23.06.2026 | 22:01
Պայթյուն Թուրքիայի զինամթերքի պահեստներից մեկում. կան զոհեր
Թրամփը հրաժարվել է Հարիսի հետ «ռևանշ» բանավեճից
Քաղաքականություն
10.10.2024 | 11:27
Հանրապետական կուսակցությունից ԱՄՆ նախագահի թեկնածու Դոնալդ Թրամփը բացառել է նախագահական երկրորդ բանավեճը դեմոկրատական կուսակցությունից իր մրցակից Քամալա Հարիսի հետ՝ մի քանի ժամ անց այն բանից հետո, երբ Fox News-ն առաջարկել է հյուրընկալել թեկնածուներին այս ամսվա վերջին մինչև ընտրությունների օրը՝ նոյեմբերի 5-ը, գրում է France 24-ը:
«Արդեն շատ ուշ է, վաղաժամ քվեարկությունն արդեն սկսվել է, ռևանշ չի լինելու։ Քամալան երեկ հստակ հայտարարեց, որ Ջո Բայդենից տարբերվող ոչինչ չի անելու, ուստի բանավիճելու բան չկա»,- նշել է Թրամփը Truth սոցիալական հարթակում՝ հերքելով Ֆիլադելֆիայում թեկնածուների առաջին բանավեճը շարունակելու հնարավորությունը:
Հարիսը նախկինում Թրամփին հրավիրել էր հոկտեմբերի 23-ին CNN-ի կողմից կազմակերպված բանավեճին, սակայն ԱՄՆ նախկին նախագահը մերժել էր:
Fox-ն իր հերթին չորեքշաբթի նամակներ է ուղարկել երկու կողմերին՝ առաջարկելով Հարիսի և Թրամփի միջև «բանավեճի եզրափակիչ քայլը»՝ հոկտեմբերի 24-ին կամ հոկտեմբերի 27-ին:
«Սա հնարավորություն կտա յուրաքանչյուր թեկնածուին ներկայացնել իր եզրափակիչ փաստարկները»,- նշել էր Fox News Media-ի նախագահ Ջեյ Ուոլեսը։
Թարգմանությունը՝ Էմմա Չոբանյանի
