ԵՄ առաքելության տեղակայումը Հայաստանում խոչընդոտում է խաղաղության գործընթացին և սրում իրավիճակը Հարավային Կովկասում․ Ադրբեջանի ԳՇ պետ

Ադրբեջանի պաշտպանության նախարար առաջին տեղակալ, ԳՇ պետը Քերիմ Վելիևը Բաքվում գտնվող ՆԱՏՕ-ի միջազգային ռազմական շտաբի պետ, գեներալ-լեյտենանտ Յանուշ Ադամչակի հետ հանդիպմանը բարձր է գնահատել դաշինքի հետ հարաբերությունների ներկա մակարդակը և ընդգծել փոխգործակցության զարգացման կարևորությունը։

Ադրբեջանի ՊՆ-ի հաղորդագրության համաձայն՝ նա նաև խոսել է Արցախյան 44-օրյա պատերազմի մասին՝ հայտարարելով, թե ռազմական ագրեսիայի ընթացքում «Ադրբեջանը պահպանել է միջազգային մարդասիրական իրավունքի նորմերն ու սկզբունքները՝ առանց թիրախավորելու խաղաղ բնակչությանը»։

Վելիևը նաև բողոքել է ՀՀ-ում տեղակայված ԵՄ քաղաքացիական դիտորդական առաքելությունից և մի շարք երկրների, այդ թվում՝ Ֆրանսիայի հետ Հայաստանի ռազմական համագործակցությունից։ Նա ասել է, թե, իբր, «Եվրամիության դիտորդական առաքելության տեղակայումը Հայաստանի տարածքում, ինչպես նաև տարածաշրջանից դուրս որոշ երկրների, մասնավորապես, Ֆրանսիայի կողմից ՀՀ-ին զինելը խոչընդոտներ են ստեղծում Ադրբեջանի և Հայաստանի միջև հարաբերությունների կարգավորման համար և խոչընդոտում խաղաղության գործընթացին՝ սրելով իրավիճակը Հարավային Կովկասում»։

Ուշագրավ է, որ այցի ընթացքում ՆԱՏՕ-ի պատվիրակությունն այցելել է նաև Բաքվում գտնվող «Շեհիդների պուրակ» և, այսպես կոչված, «Ռազմավարի պուրակ»։

Հավելենք, որ օրերս ՆԱՏՕ-ի պատվիրակությունն Ադամչակի գլխավորությամբ Հայաստանում էր, որի ընթացքում հանդիպում էր տեղի ունեցել ՀՀ ԶՈՒ-ի ԳՇ պետ Էդվարդ Ասրյանի հետ։ ՆԱՏՕ-ի պատվիրակությունն այցելել էր Վազգեն Սարգսյանի անվան ռազմական ակադեմիա։

Թարգմանությունը՝ Էմմա Չոբանյանի