17.12.2025 | 18:25
ԱԱԾ-ն վարչապե՞տ, թե՞ քաղաքացի Փաշինյանի հորդորով է հոգևորականներին խնդրել զեղչել կաթողիկոսի անունը
Մահապատժի երկիր արտահանձնվելու վտանգի առաջ․ բելառուսցին ահազանգում է՝ կարող է խոշտանգման ենթարկվել․ ՏԵՍԱՆՅՈՒԹ
Քաղաքականություն
08.10.2024 | 21:32
Վտանգ կա, որ ավելի քան 7 ամիս Հայաստանում անազատության մեջ գտնվող Բելառուսի քաղաքացի Վլադիմիր Բալանդինը, հնարավոր է, արտահանձվի։ Այս մասին ահազանգում է նրա իրավունքների պաշտպանությամբ զբաղվող Հելսինկյան քաղաքացիական ասամբլեայի Վանաձորի գրասենյակը։ Երեկ Բալանդինն անձամբ է զանգել իր փաստաբանին և հայտնել՝ այս մասին իրեն կալանավայրում են տեղեկացրել։
Բալանդինը հայ իրավապահների կողմից ձերբակալվել է մարտի 10-ին՝ Բագրատաշենի անցակետում։ Թեև Բելառուսում նրա նկատմամբ հարուցված է քրեական հետապնդում տնտեսական հանցագործության մասին հոդվածի հատկանիշներով, սակայն պաշտպանական կողմը պնդում է՝ Բալանդինի նկատմամբ քաղաքական հետապնդում է իրականացվում, քանի որ նա մասնակցել է անհնազանդության ակցիաների։
Արդեն ապրիլի 10-ին ՀՀ Գլխավոր դատախազությունը ստացել էր Բալանդինին արտահանձնելու մասին միջնորդություն, իսկ մայիսի 31-ին կայացրել հանձնումը թույլատրելու մասին որոշում՝ պատճառաբանելով, որ Բելառուսի Գլխավոր դատախազությունը տրամադրել է միջազգային պայմանագրերով նախատեսված Բալանդինի իրավունքների և ազատությունների պաշտպանության երաշխիքներ։ ՀՔԱՎ-ը, սակայն, հակադարձում է՝ չեն կարող լինել այդպիսի երաշխիքներ այս պարագայում։
Դատախազության կողմից արտահանձումը թույլատրելու որոշումը ստանալուց հետո Բալանդինի պաշտպանական խումբն այն բողոքարկել է Վերաքննիչ, ապա Վճռաբեկ դատարաններ, բայց՝ անարդյունք։ Չատինյանը դիմել է նաև Մարդու իրավունքների եվրոպական դատարան, սակայն դեռևս որևէ պատասխան չի ստացել։
Թեև այս պահի դրությամբ կողմը պաշտոնապես չի ծանուցվել մոտալուտ արտահանձման մասին, այնուամենայնիվ, փաստաբանն ընդգծում է՝ արտահանձնելով՝ Հայաստանը կխախտի կոնվենցիայի 3-րդ հոդվածը։
Ահազանգի և բարձրաձայնված մտահոգությունների մասով Factor TV-ն դիմեց Գլխավոր դատախազություն, գերատեսչությունից, սակայն, չմեկնաբանեցին։
Անցնող տարվա ընթացքում Բելառուսի իշխանությունների կողմից հետապնդվող երեք քաղաքացու Հայաստանը քաղաքական ապաստան է տրամադրել․ ավելի վաղ նրանք հայ իրավապահների կողմից ձերբակալվել էին և արտահանձնման վտանգի առաջ կանգնել։
Մանրամասները՝ տեսանյութում։
Ռոզա Վարդանյան
