21.11.2024 | 23:30
Թուրքիայում ընդդիմադիր քաղաքապետներին դատապարտել են ազատազրկման «ահաբեկչության» մեղադրանքով
Իսրայելական բանակը հայտարարել է Բեյրութում «Հըզբոլլահ»-ի շտաբի հրամանատարի ոչնչացման մասին
Քաղաքականություն
08.10.2024 | 12:37
Իսրայելի պաշտպանության բանակը հայտնել է, որ Բեյրութի վրա հարձակման ժամանակ սպանվել է լիբանանյան «Հըզբոլլահ» շարժման շտաբի հրամանատար Սուհեյլ Հուսեյն Հուսեյնին։ Իսրայելցի զինվորականները պնդմամբ՝ նա վճռորոշ դեր է խաղացել Իրանի և «Հըզբոլլահ»-ի միջև զենքի մատակարարման գործում:
«Իսրայելի ռազմաօդային ուժերը ճշգրիտ, հետախուզական տվյալների վրա հիմնված հարված են հասցրել Բեյրութի շրջանին՝ սպանելով Սուհեյլ Հուսեյն Հուսեյնին: Նա պատասխանատու էր «Հըզբոլլահ»-ի ամենակարևոր նախագծերի, բյուջեի և նյութատեխնիկական ապահովման համար, ներառյալ՝ հատուկ գործողությունները, ինչպիսիք են Լիբանանից և Սիրիայից Իսրայելի դեմ ահաբեկչական հարձակումների համակարգումը»,- ասվում է հայտարարության մեջ:
Հոկտեմբերի 7-ին իսրայելական բանակը հայտարարեց Լիբանանում «Հըզբոլլահ»-ի դեմ ռազմական գործողության գոտու ընդլայնման մասին։ Սա լիբանանյան սահմանի չորրորդ շրջանն է, որը փակել է իսրայելական բանակը։ Առաջին փակ ռազմական գոտու ստեղծման մասին հայտարարվել էր հոկտեմբերի 1-ին՝ Լիբանանում սահմանափակ հարձակողական գործողության մեկնարկից մի քանի ժամ առաջ։
Թարգմանությունը՝ Տաթև Ֆռանգյանի
