11.08.2026 | 00:05
Երկրաշարժ Վարդենիս քաղաքից 26 կմ հյուսիս-արևելք
«Հըզբոլլահ»-ը մեկ օրում 190 արկ է արձակել Իսրայելի ուղղությամբ. Իսրայելն ուժեղացրել է հարվածները խմբավորման օբյեկտներին
Քաղաքականություն
08.10.2024 | 10:46
Իսրայելի պաշտպանության բանակը հայտնել է, որ հոկտեմբերի 7-ին 190 արկ է արձակվել Լիբանանից «Հըզբոլլահ» խմբավորման կողմից։
Ըստ իսրայելացի զինվորականների՝ տուժել է առնվազն 12 մարդ, պարզաբանում է Reuters-ը։ Հրթիռային նախազգուշացումներ են հնչել Իսրայելի հյուսիսում, ներառյալ Ավիվիմ և Կիրյաթ Շմոնա շրջանները:
Իրանի կողմից աջակցվող լիբանանյան «Հըզբոլլահ» խմբավորումն իր հերթին հայտարարել է, որ «Ֆադի-1» հրթիռներով հարվածել է Հայֆայից հարավ գտնվող ռազմաբազային: Հերթական հարվածը զինյալների կողմից հասցվել է սահմանից 65 կիլոմետր հեռավորության վրա գտնվող Տվերիա քաղաքին։
Իսրայելի պաշտպանության բանակը հայտնել է, որ ռազմական ինքնաթիռները ռմբակոծել են «Հըզբոլլահի» թիրախները Լիբանանի հարավում։ Իսրայելական զինուժը Լիբանանում իր ցամաքային գործողությունը բնութագրում է որպես «տեղական, սահմանափակ և թիրախային», սակայն, ինչպես գրում է Reuters-ը, «դրա մասշտաբները անշեղորեն աճում են անցյալ շաբաթվանից»:
Իսրայելի պաշտպանության բանակը հոկտեմբերի 1-ից ցամաքային գործողություն է իրականացնում ՀԱՄԱՍ-ի դաշնակից լիբանանյան «Հըզբոլլահ» խմբավորման դեմ (խմբավորումը ճանաչված է որպես ահաբեկչական ԱՄՆ-ում և Եվրամիությունում): Իսրայելի պատերազմը ՀԱՄԱՍ-ի հետ շարունակվում է արդեն մեկ տարի։
Թարգմանությունը՝ Տաթև Ֆռանգյանի
