Շոյգուի նախկին տեղակալին նոր մեղադրանք է առաջադրվել

ՌԴ Պաշտպանության նախկին փոխնախարար Տիմուր Իվանովին, որը ձերբակալվել էր կաշառակերության գործով, նոր մեղադրանք է առաջադրվել, ՏԱՍՍ-ին հայտնել են իրավապահ մարմիններում։ Նրան մեղադրանք է առաջադրվել առանձնապես խոշոր չափերով յուրացման երկու հոդվածով (Քրեական օրենսգրքի 160-րդ հոդվածի 4-րդ մաս), փոխանցում է The Moscow Times-ը:

Հետաքննության տվյալներով՝ Իվանովն արտարժույթի առքուվաճառքի անվան տակ արտասահմանյան Turinvest Services Limited (Հոնկոնգ) և Fromarc Investments Limited ընկերությունների հաշիվներին փոխանցել է Interkommerts բանկից ստացված ավելի քան 3 միլիարդ ռուբլի։ Նա մեղադրվում է նաև ՊՆ դուստր ձեռնարկության միջոցով Կերչի լաստանավի համար երկու լաստանավ գնելու ժամանակ ավելի քան 200 միլիոն ռուբլու յուրացման մեջ։

Իվանովի դեմ ցուցմունք է տվել նրա նախկին ենթակա Անտոն Ֆիլատովը, որը համագործակցում է հետաքննության հետ։ Այս քրեական գործով նախաքննությունն արդեն ավարտվել է։ Այն նախաձեռնվել էր դեռևս 2016 թվականին, սակայն մի քանի տարի անց դադարեցվել, իսկ 2024 թվականին՝ վերաբացվել։ Ինքը՝ Իվանովը, մեղքը չի ընդունում։

Տիմուր Իվանովը, որը պաշտպանության փոխնախարարն էր 2016 թվականից և համարվում էր Սերգեյ Շոյգուի մերձավորը, ձերբակալվել է ապրիլին՝ 1,185 միլիարդ ռուբլու կաշառակերության մեղադրանքով (Քրեական օրենսգրքի 290-րդ հոդվածի 6-րդ մաս):

Ըստ քննիչների՝ Իվանովը, որը վերահսկում էր ռազմական շինարարական համալիրը, օգնել է կապալառուներին պայմանագրեր ստանալ ՊՆ-ից՝ իր օբյեկտներում անվճար շինարարական աշխատանքների դիմաց: Նրան սպառնում է մինչև 15 տարվա ազատազրկում։

Թարգմանությունը՝ Տաթև Ֆռանգյանի