Իսրայելը երկրորդ փակ գոտին է հայտարարել Լիբանանի հետ սահմանին

Իսրայելի պաշտպանության բանակը Լիբանանի հետ սահմանին գտնվող ևս երեք շրջաններ փակ ռազմական գոտի է հայտարարել։ «Իրավիճակը գնահատելուց հետո» մուտքը տարածաշրջան արգելվել է, ասվում է Իսրայելի պաշտպանության բանակի տելեգրամյան ալիքում հրապարակված հաղորդագրության մեջ, փոխանցում է DW-ի ռուսական ծառայությունը։

Խոսքը հյուսիսային Իսրայելի Մանարա, Իֆթահ և Մալկիա կիբուցների մասին է։ Սեպտեմբերի 30-ին Իսրայելի պաշտպանության բանակը Մետուլա, Միսգավ Ամ և Քֆար Գիլադի համայնքների հարակից տարածքները հայտարարեց ռազմական գոտի։

Իրավիճակը Մերձավոր Արևելքում կտրուկ վատթարացավ 2023 թվականի հոկտեմբերի 7-ին։ Եվրամիության և ԱՄՆ-ի կողմից ահաբեկչական ճանաչված արմատական իսլամիստական ՀԱՄԱՍ շարժումը լայնածավալ հարձակում իրականացրեց Իսրայելի վրա՝ ներխուժելով երկրի տարածք և իրականացնելով իսրայելական ժամանակակից պետության պատմության մեջ խաղաղ բնակչության ամենամեծ ջարդը՝ սպանելով շուրջ 1200 մարդու։ Գրոհայինները նաև մոտ 250 պատանդ էին վերցրել՝ իրենց հետ տանելով Գազայի հատված։

Պատանդներից մի քանիսը փոխանակվել կամ ազատ են արձակվել, իսկ մյուսները մահացել են։ Ի պատասխան՝ Իսրայելը ցամաքային գործողություն է սկսել Գազայում։

Գազայի հատվածի ցամաքային գործողության և ռմբակոծության արդյունքում, ՀԱՄԱՍ-ի կողմից վերահսկվող Առողջապահության նախարարության տվյալներով, զոհվել է ավելի քան 41,8 հազար պաղեստինցի։ Պաղեստինցի զինյալներին աջակցում էր լիբանանյան «Հըզբոլլահ» շարժումը, որը Գերմանիայում, ԱՄՆ-ում, Իսրայելում և մի շարք արաբական երկրներում ճանաչված է որպես ահաբեկչական կազմակերպություն։ «Հըզբոլլահը» պարբերաբար հրթիռակոծում է Իսրայելի տարածքը Լիբանանից։

2024 թվականի սեպտեմբերի երկրորդ կեսին Իսրայելը հայտարարեց «Հըզբոլլահի» դեմ «կանխարգելիչ ռազմական գործողության» մասին։ Բեյրութում իսրայելական ավիահարվածների հետևանքով շիաների շարժման մի քանի առաջնորդներ են սպանվել։

Սեպտեմբերի 30-ին Իսրայելը «սահմանափակ» ցամաքային գործողություն է սկսել հարավային Լիբանանի սահմանային գոտում գտնվող «Հըզբոլլահ»-ի թիրախների դեմ։

Թարգմանությունը՝ Տաթև Ֆռանգյանի