Հասարակություն
07.10.2024 | 12:52
ՀՀ կրթության, գիտության, մշակույթի և սպորտի նախարարի տեղակալ Արթուր Մարտիրոսյանն ընդունել է ԱՄՆ գիտության ազգային հիմնադրամի (NSF) ներկայացուցիչներ Սոհի Ռաստեգարին և Ալեքսանդր Սիմոնյանին․ տեղեկացնում են ՀՀ ԿԳՄՍՆ-ից։
Նախարարի տեղակալը ողջունել է հիմնադրամի ներկայացուցիչներին և կարևորել երկկողմ համագործակցության անհրաժեշտությունը:
Անդրադառնալով բարձրագույն կրթության և գիտության ոլորտում իրականացվող պետական քաղաքականությանը՝ Արթուր Մարտիրոսյանն անդրադարձել է «Բարձրագույն կրթության և գիտության մասին» նոր օրենքի մշակման աշխատանքներին: Նրա խոսքով՝ նախագծով հստակեցվել են բարձրագույն կրթության որակին ներկայացվող պահանջները, բուհերի կառավարման և խոշորացման գործընթացը, որի նպատակը հետազոտահեն կրթության կազմակերպումն է:
Արթուր Մարտիրոսյանը նաև տեղեկացրել է՝ «ՀՀ կրթության՝ մինչև 2030 թվականի զարգացման պետական ծրագրով» Հայաստանում նախատեսվում է ակադեմիական քաղաքի ստեղծում, որի գլխավոր հատակագծի հայեցակարգն արդեն հաստատվել է:
ԿԳՄՍ նախարարի տեղակալն անդրադարձել է նաև միջազգային համագործակցությանը՝ բարձրագույն կրթության ոլորտում առանձնացնելով Հայաստան-ԵՄ արդյունավետ փոխգործակցությունը, մասնավորապես՝ «Էրազմուս+», «Հորիզոն Եվրոպա» ծրագրերը: Արթուր Մարտիրոսյանը մեծապես կարևորել է գիտության ոլորտում ԱՄՆ-ի հետ համագործակցությունը և վերահաստատել պատրաստակամությունն ԱՄՆ գիտության ազգային հիմնադրամի հետ համագործակցության կայացման աշխատանքներն ակտիվացնելու առումով։
ԱՄՆ գիտության ազգային հիմնադրամի (NSF) ներկայացուցիչ Սոհի Ռաստեգարը շնորհակալություն է հայտնել ընդունելության համար և բարձր գնահատել Հայաստանի կառավարության ջանքերը՝ ուղղված երկրում գիտության զարգացմանը: Նա ներկայացրել է ԱՄՆ գիտության ազգային հիմնադրամի գործունեությունը՝ շեշտելով, որ հետաքրքրված են Հայաստանի հետ համագործակցությամբ:
