Ղրիմում ԱԹՍ-ների հարձակումից հետո հրդեհ է բռնկվել նավթի պահեստում

Ռուսաստանի կողմից Բռնակցված Ղրիմում հոկտեմբերի 6-ի լույս 7-ի գիշերը հրդեհ է բռնկվել Թեոդոսիայի նավթի պահեստում, գրում է Meduza-ն։

Ռուսաստանի կողմից նշանակված քաղաքային իշխանությունները հայտնել են, որ հրդեհի պատճառով տեխնածին քաղաքային արտակարգ իրավիճակ է հայտարարվել: Սակայն ավելի ուշ իշխանությունները  հերքել են  տեղեկությունը՝ դա անվանելով «տեխնիկական սխալ»։

Նշվում է, որ նավթի պահեստին հարող երկու փողոցների երթևեկությունն արգելափակված է։ Արտակարգ իրավիճակների նախարարության աշխատակիցները մարում են հրդեհը։ Թեոդոսիայի վարչակազմի ղեկավար Իգոր Տկաչենկոն ասել է, որ զոհեր ու վիրավորներ չկան։ Հրդեհի պատճառների մասին քաղաքապետարանից ոչինչ չեն հայտնել։ Տեղի բնակիչները սոցիալական ցանցերում հայտնել են, որ հրդեհից առաջ պայթյուններ են լսել:

ՌԴ ՊՆ-ն հայտարարել է, որ գիշերը հերթապահող հակաօդային պաշտպանության ուժերը ոչնչացրել են 12 ուկրաինական անօդաչու թռչող սարք Ղրիմի, ևս վեցը՝ Կուրսկի շրջանի և մեկական անօդաչու թռչող սարք՝ Բելգորոդի, Բրյանսկի և Վորոնեժի շրջաններում։

«Астра»-ի  և ուկրաիանական «Крымский ветер» տելեգրամյան ալիքի տվյալներով՝ Թեոդոսիայում անօդաչու թռչող սարքի հարձակման թիրախը եղել է «Ծովային նավթային տերմինալը»՝ նավթամթերքների փոխադրման ծավալներով Ղրիմում ամենամեծը։ Լրատվամիջոցների տեղեկություններով՝ այս նավթապահեստն  արդեն հարձակման է ենթարկվել ուկրաինական անօդաչու թռչող սարքերի կողմից 2023 թվականի ձմռանը և 2024 թվականի գարնանը։

«Крымский ветер»-ը, վկայակոչելով ականատեսներին, գրում է, որ Ղրիմում հարձակման են ենթարկվել նաև Սակիի և Բելբեկի ռազմական օդանավակայանները։

Ուկրաինայի Զինված ուժերի գլխավոր շտաբը հաստատել է Թեոդոսիայում նավթային տերմինալի վրա հարձակումը՝ նշելով, որ այս նավթապահեստն օգտագործվում է նաև «Ռուսաստանի Դաշնության օկուպացիոն բանակի կարիքները բավարարելու համար»։

Թարգմանությունը՝ Էմմա Չոբանյանի