Ռուսական զինուժը հարվածներ է հասցրել Կիևին և Խարկովին, Ղրիմի տարածքում պայթյուններ են հնչել

Երկուշաբթի լույս հոկտեմբերի 7-ի գիշերը ռուսական զորքերը կառավարվող ռումբերով հարվածներ են հասցրել Խարկովին և Խարկովի մարզին, փոխանցում է DW-ի ռուսական ծառայությունը։

Խարկովի շրջանային ռազմական վարչակազմի ղեկավար Օլեգ Սինեգուբովի խոսքով՝ Խարկովի Շևչենկովսկի շրջանի անտառային պուրակում կառավարվող ավիառումբ է ընկել, զոհեր և վիրավորներ չկան։ Մեկ այլ ռումբ էլ ընկել է Խարկովի մարզի Չերկասկայա Լոզովայա գյուղի բնակելի տան վրա, ինչի հետևանքով երեք մարդ է վիրավորվել, հայտնել է պաշտոնյան։

Իր հերթին Կիևի քաղաքապետ Վիտալի Կլիչկոն հայտնել է, որ Ուկրաինայի մայրաքաղաքը հարձակման է ենթարկվել ռուսական անօդաչու թռչող սարքերի կողմից։ Քաղաքում հակաօդային պաշտպանությունն է աշխատում, իսկ Կիևի տարբեր շրջաններում պայթյունների ձայներ են լսվել։

Միաժամանակ, Telegram ալիքները հայտնում են Ռուսաստանի Դաշնության կողմից բռնակցված Ղրիմի տարածքում պայթյունների մասին։ Ռուսամետ «ՉՊ/Սիմֆերոպոլ» տելեգրամ ալիքի փոխանցմամբ՝ օդային հարձակման սպառնալիք է հայտարարվել թերակղզու ողջ տարածքում։ Հաղորդվում է նաև Նովոֆեդորովկայի «Սակի» օդանավակայանի տարածքում պայթյունների մասին։ Ըստ «Կռիմսկիյ վետեր» տելեգրամ ալիքի՝ պայթյուններ են լսվել նաև Սիմֆերոպոլում և դրա արվարձաններում։

Ինչպես հայտնել է բռնկակցված թերակղզու «ղեկավարի» խորհրդական Օլեգ Կրյուչկովը, հրդեհ է բռնկվել Թեոդոսիայի նավթի պահեստում։ Թեև պաշտոնյան չի բացահայտել հրդեհի պատճառները, սակայն սոցցանցերում հրապարակված տեսանյութերում լսվում է օդային տագնապի ազդանշանի ձայնը։ Astra Telegram ալիքի հրապարակած տեսանյութում ձայնային մեկնաբանություն է հնչում. «Այնուամենայնիվ, խոցեցին նավթի բազան»։
Ըստ Astra-ի՝ դա կարող է լինել Թեոդոսիայի «Ծովային նավթի տերմնինալը», որը նավթամթերքների փոխադրման ծավալներով Ղրիմի ամենամեծ տերմինալն է:

Թարգմանությունը՝ Տաթև Ֆռանգյանի