Իսրայելում ՀԱՄԱՍ-ի հարձակման տարելիցին նվիրված սգո միջոցառումները խաթարվել են Գազայից հրթիռակոծությամբ

Իսրայելում սգո միջոցառումները, որոնք սկսվել են  հոկտեմբերի 7-ի առավոտյան՝ պաղեստինյան ՀԱՄԱՍ արմատական շարժման զինյալների կողմից երկրի վրա իրականացված լայնածավալ հարձակման տարելիցի օրը, մեկնարկից ընդամենը մի քանի րոպե անց խաթարվել են՝ Գազայի հատվածից հրետակոծության պատճառով, փոխանցում է DW-ի ռուսական ծառայությունը։

Հիշատակի արարողությունը Կիբուց Ռեյմում սկսվել է առավոտյան ժամը 6.29-ին․ հենց այդ ժամանակ են ՀԱՄԱՍ-ի զինյալները հարձակվել կիբուցի վրա 2023 թվականի հոկտեմբերի 7-ին և սպանել Supernova երիտասարդական երաժշտական փառատոնի ավելի քան 370 մասնակիցների:

Իսրայելի նախագահ Իցհակ Հերցոգի մասնակցությամբ սգո միջոցառումները սկսվել են մեկ րոպե լռությամբ։ Հավաքվածների թվում են եղել զոհվածների հարազատները։

Արարողության մեկնարկից ընդամենը երկու րոպե անց օդային տագնապ է հնչել տարածաշրջանի մի շարք բնակավայրերում՝ Գազայի հատվածից չորս արկ է արձակվել Իսրայելի ուղղությամբ: Իսրայելի ռազմաօդային ուժերը որսացել են երեք արկը, ևս մեկ ընկած արկ հայտնաբերվել է բաց տարածքում։

ՀԱՄԱՍ-ի «Էսեդին ալ-Քասամ բրիգադն» անմիջապես ստանձնել է հարձակման պատասխանատվությունը՝ հայտարարելով, որ իր անդամները գնդակոծել են «թշնամական հավաքները» Ռաֆահ և Քերեմ Շալոմ սահմանային անցակետերում, ինչպես նաև Գազայի հատվածի հետ սահմանին գտնվող Կիբուց Հոլիցում:

Նախատեսվում է, որ հոկտեմբերի 7-ին Իսրայելի նախագահը հիշատակի արարողություն կանցկացնի հարավային Սդերոտ քաղաքում։ Նախատեսվում են նաև մի շարք այլ միջոցառումներ։ Երեկոյան հեռուստատեսությամբ կցուցադրվի նախապես ձայնագրված պաշտոնական արարողությունը։

Սպասվում է, որ Իսրայելի վարչապետ Բենիամին Նեթանյահուն հեռուստատեսային ուղերձով կդիմի ժողովրդին։

Հոկտեմբերի 7-ին սգո միջոցառումներ են տեղի ունենում նաև մի շարք այլ երկրներում՝ Գերմանիայում, Ֆրանսիայում, Նիդերլանդներում, Իսպանիայում և Շվեյցարիայում։

Թարգմանությունը՝ Տաթև Ֆռանգյանի