Էջմիածնի տարածաշրջանը սնող վթարված ջրատարը վերականգնվել է, երեկոյան համայնքներում ջուր կլինի․ «Վեոլիա ջուր» 

Էջմիածնի տարածաշրջանը սնող վթարված ջրատարը վերականգնվել է, այս մասին  Factor.am-ի հետ զրույցում հայտնեցին «Վեոլիա ջուր» ընկերությունից։ Ընկերության մամուլի ծառայությունից մանրամասնեցին, որ ջրատարը եռակցման կարից պոկվել էր։ Ընկերության աշխատակիցները ժամականավոր լուծում են գտել և երեկոյան արդեն Էջմիածնի տարածաշրջանի համայնքները ջուր կունենան։

«Վեոլիա ջուր» ընկերության Էջմիածնի տեղամասի վթարային խմբի ղեկավար Խաչիկ Սողոմոնյանի խոսքով՝ այս պահին իրենք ջրատարի վրա ամրաշինական աշխատանքներ են կատարում։

«Ամրաշինական աշխատանքներ են կատարվում, որպեսզի հետագայում կրկին խնդիր չլինի։ Ջուրն արդեն բացել ենք, և 1 ժամից ցանցը կկարգավորվի։ Վթարի հետևանքով ցանցը դատարկվել էր, որը բավականին մեծ տարածություն ունի։ Ցանցը լցվելու համար ժամանակ է պետք՝ 1-2 ժամ»,- փոխանցեց նա։

«Վեոլիա ջուր» ընկերության Էջմիածնի տեղամասի ներկայացուցիչը նաև նշեց, որ խողովակները տեղ-տեղ հնամաշ են, ինչն էլ կարող էր վթարի պատճառ դառնալ։

Սնուցող ջրատարը վնասվել էր Այգեշատ  համայնքի տարածքում։ Համայնքի վարչական ղեկավար Լիպարիտ Հարությունյանն ասաց, որ սա առաջին դեպքը չէ, որը ջրատարը վնասվում է։

«Այս ընթացքում համայնքների ջրամատակարարումը չի դադարեցվել, պարզապես ջրի ճնշումն էր նվազել։ Սկզբից տպավորություն էր՝ ահավոր վթար էր, բայց այդպես չէր, հեշտ վերականգնեցինք»,- ներկայացրեց  վարչական ղեկավարը։

Ավելի վաղ «Վեոլիա ջուր» ընկերությունը հաղորդագրություն էր տարածել, որ վթարվել է Էջմիածնի տարածաշրջանը սնող 600 մմ-ոց ջրատարը՝ վայրկյանում 100 լիտր ջրի կորստով:

«Դրանով պայմանավորված հոկտեմբերի 4-ին՝ ժամը 12:00-ից մինչև հոկտեմբերի 5-ը ժամը 24:00-ը, կդադարեցվի Արմավիրի մարզի՝ Էջմիածին քաղաքի, Արտիմետ, Արևաշատ, Այգեշատ, Ամբերդ, Արշալույս, Աղավնատուն, Արագած, Արտամետ, Գեղակերտ, Դաշտ, Դողս, Լեռնամերձ, Խորոնք, Ծաղկալանջ, Ծիածան, Ծաղկունք, Հայթաղ, Հովտամեջ, Մրգաստան, Մուսալեռ, Շահումյան, Ոսկեհատ, Պտղունք, Ֆերիկ, Շենիկ, Արևադաշտ, Արգին գյուղերի ջրամատակարարումը»,- ասված էր հաղորդագրության մեջ:

Մանյա Պողոսյան