Վերջ տվեք վտանգավոր խաղերին․ Ալիևը սպառնացել է Հայաստանին

Ադրբեջանի նախագահ Իլհամ Ալիևը Ջրականում մի խումբ բնակիչների հետ հանդիպման ժամանակ կրկին բողոքել է Մինսկի խմբի գործունեությունից՝ հայտարարելով, թե «Ֆրանսիան և նրա նման արևմտյան երկրներն ամեն ինչ արել են, որ ադրբեջանական տարածքների օկուպացիան մշտական լինի»։

«Ես նաև զգուշացնում եմ Հայաստանին՝ վե՛րջ տվեք այդ վտանգավոր խաղերին։ Մի կողմից խոսում են խաղաղությունից, մյուս կողմից՝ լայնածավալ սպառազինություն են ձեռք բերում։ Ո՞վ է նրանց զենք տալիս: Ֆրանսիան և այլ հակաադրբեջանական երկրները։ Ինչո՞ւ են նրանց անվճար տալիս այդ զենքերը։ Ինչքան էլ փորձեն, ոչինչ չի ստացվի»,- ասել է Ալիևը, որն ընդամենը մի քանի օր առաջ հայտարարում էր, որ Ադրբեջանի գլխավոր առաջնահերթությունը ռազմական հզորացումն է։

Նշենք, որ որևէ երկիր Հայաստանին անվճար սպառազինություն չի մատակարարում, ՀՀ-ն այն գնում է կնքված պայմանագրերին համապատասխան։

Բացի այդ, Ալիևը կոչ է արել «հանգիստ թողնել Հարավային Կովկասը և զբաղվել սեփական գործերով»։

«Թող զբաղվեն իրենց խնդիրներով, լվանան իրենց արյունոտ անցյալը և փորձեն մաքրել իրենց մեղքերը։ Թող դադարեցնեն գաղութատիրական քաղաքականությունը, դադարեցնեն ճնշել ժողովուրդներին, դադարեն քիթը խոթել ամեն տեղ։ Սա իմ նախազգուշացումն է»,- հայտարարել է Ալիևը՝ հավելելով․թե «Հայաստանը միացել է վտանգավոր խաղերի, բայց չպետք է մոռանա Ղարաբաղյան երկրորդ պատերազմի պատմությունը»։

Թարգմանությունը՝ Էմմա Չոբանյանի