Թուրքիայի ԱԽ-ն աջակցություն է հայտնել Լիբանանին

Թուրքիայի նախագահ Ռեջեփ Թայիփ Էրդողանի ղեկավարությամբ 3,5 ժամ տևողությամբ անցկացված Ազգային անվտանգության խորհրդի նիստում Անկարան դատապարտել է Իսրայելի կողմից ՄԱԿ-ի գլխավոր քարտուղարին անցանկալի անձ հայտարարելը և նրա մուտքը երկիր արգելելը՝ այն որակելով որպես «իսրայելական անօրինականության վերջին օրինակ»։

Նշվում է, որ ի լրումն Թուրքիայի վճռական ջանքերին՝ «վերջ դնելու պաղեստինցի ժողովրդի նկատմամբ արդեն մեկ տարի աշխարհի առջև իրականացվող ցեղասպանությանը և Պաղեստինում առանց հապաղելու կայուն զինադադար և խաղաղություն ապահովելուն, անհրաժեշտ է նաև շարունակել միջազգային ջանքերը»։

«Պաղեստինյան տարածքներից դուրս Իսրայելի կողմից իրականացվող հարձակումները կանխելու համար պատասխանատուներին, հատկապես՝ ՄԱԿ-ի Անվտանգության խորհրդին, կոչ է արվում հնարավորինս արագ ձեռնարկել համապատասխան քայլեր։ Թուրքիան կաջակցի եղբայրական Լիբանանի ժողովրդին և կառավարությանը Իսրայելի անմարդկային հարձակումների դեմ»,- նշվում է հայտարարության մեջ։

Դրա համաձայն՝ ընդգծվել է, որ «Թուրքիան թույլ չի տա, որ չարաշահվեն Միջերկրական և Էգեյան ծովերում մշտական ​​կայունության և խաղաղության հաստատման հիման վրա համագործակցությունը զարգացնելու իր անկեղծ մոտեցումն ու ջանքերը»։

Թուրքական լրատվամիջոցների փոխանցմամբ՝ ԱԽ նիստում անդրադարձ է եղել նաև երկրում և արտերկրում իրականացվող գործողություններին՝ ուղղված PKK/KCK-PYD/YPG-ի, FETÖ-ի և ԻԼԻՊ-ի դեմ։

Թարգմանությունը՝ Էմմա Չոբանյանի