08.09.2026 | 23:30
Պապիկյանը այցելել է ՊՆ ուսումնական կենտրոն, հրամկազմին տրվել են մի շարք հանձնարարականներ
Ուկրաինան Հաագայի արբիտրաժային դատարանին կոչ է արել ՌԴ-ին պարտավորեցնել՝ ապամոնտաժել Ղրիմի կամուրջը
Քաղաքականություն
04.10.2024 | 14:51
Ուկրաինան կոչ է արել Հաագայի արբիտրաժային դատարանին պարտավորեցնել Ռուսաստանին՝ ապամոնտաժել Ղրիմի կամուրջը: Այս մասին հայտարարել է Ուկրաինայի ներկայացուցիչ Օքսանա Զոլոտարևան Հաագայում կայացած լսումների ժամանակ ունեցած ելույթում, փոխանցում է «Ուկրինֆորմ»-ը։
Նրա խոսքով՝ Ռուսաստանն ապօրինաբար է կառուցել կամուրջը և հիմա պետք է քանդի այն, որպեսզի ապահովի Կերչի նեղուցով անցումը միջազգային իրավունքի համաձայն։
«Կամուրջի ապամոնտաժումը միակ ճանապարհն է վերականգնելու բոլոր երկրների նավերի անցումը, որոնք նախկինում օգտագործել են նեղուցը, և նավերի, որոնք հետագայում կօգտվեն նեղուցից»,- ասել է Զոլոտարևան:
Ուկրաինան արբիտրաժային վարույթ է հարուցել Ռուսաստանի դեմ 2016 թվականի սեպտեմբերին։ 2020 թվականին Հաագայի արբիտրաժային դատարանը հաստատել է իր իրավասությունը, և ըստ էության լսումները սկսվել են 2024-ի սեպտեմբերի 23-ին: Այս գործի շրջանակում Ուկրաինան պահանջում է կիրառել Ծովային իրավունքի մասին կոնվենցիան և պատասխանատվության ենթարկել Ռուսաստանին իր խախտումների, այդ թվում՝ Ղրիմը Կրասնոդարի երկրամասին կապող կամրջի անօրինական շինարարության համար։
Թարգմանությունը՝ Տաթև Ֆռանգյանի
