13.01.2025 | 13:02
Զբոսաշրջությունը մոտ 7 %-ով նվազել է. նախարարը թվեր ներկայացրեց․ ՏԵՍԱՆՅՈՒԹ
Վարշավայի ֆորումի նպատակը հակաադրբեջանական տրամադրություններ սերմանելն էր․ Ադրբեջանի ԱԳՆ-ն արձագանքել է Արարատ Միրզոյանին
Քաղաքականություն
03.10.2024 | 12:25
ՀՀ ԱԳ նախարար Արարատ Միրզոյանի՝ Վարշավայի անվտանգության միջազգային ֆորումում Ադրբեջանի մասին արված հայտարարություններն իրականությանը չեն համապատասխանում։ Այս մասին հայտարարել է Ադրբեջանի ԱԳՆ խոսնակ Այխան Հաջիզադեն X- իր միկրոբլոգում գրառմամբ։
«Հայաստանի ԱԳ նախարար Արարատ Միրզոյանի կողմից իրականացվել է ապատեղեկատվության, քարոզչության արշավ և մանիպուլյացիա։ Վարշավայի ֆորումի նպատակը հակաադրբեջանական տրամադրություններ սերմանելն էր»,- գրել է Հաջիզադեն։
Ըստ նրա՝ Արարատ Միրզոյանը, իբր, «մոլորեցնում է միջազգային հանրությանը»։
Ադրբեջանցի պաշտոնյան նաև հերթական անգամ «Հայաստանի ռազմական ագրեսիայի» և «Արցախում Հայաստանի ավելի քան 10,000-անոց զինված ուժերի» մասին Բաքվի թեզերն է ներկայացրել։
«Այն, ինչ Հայաստանը փորձում է ներկայացնել որպես հարձակում խաղաղ հայ բնակիչների վրա, իրականում տեղական հակաահաբեկչական միջոցառումներն էին Ադրբեջանի կողմից՝ լիովին համահունչ ՄԱԿ-ի կանոնադրությամբ իր իրավունքներին՝ զինաթափել Ադրբեջանի ինքնիշխան տարածքում ապօրինաբար տեղակայված հայկական զինված կազմավորումներին։ Հայկական կողմը պետք է հրաժարվի նման վտանգավոր մարտավարությունից և ընտրի բանականության ու օրենքի ճանապարհը»,- մասնավորապես, ասվում է հայտարարության մեջ։
Հիշեցնենք՝ Վարշավայի անվտանգության միջազգային համաժողովի ժամանակ Արարատ Միրզոյանը հայտարարել է, որ Բաքուն չի ցանկանում ստորագրել խաղաղության պայմանագիրը, ինչ-ինչ պատճառներով, ինչ-որ հաշվարկներով ամեն անգամ նորանոր նախապայմաններ է առաջ քաշում։ Նա նաև խոսել է Հայաստանի նկատմամբ Ադրբեջանի տարածքային նկրտումներից։
Թարգմանությունը՝ Էմմա Չոբանյանի
