13.06.2026 | 11:33
Հնդկաստանում ՀՀ դեսպանը մասնակցել է Sri Lanka EXPO-2027 ցուցահանդեսի միջոցառումների վերաբերյալ քննարկումներին
«Հենվեց պատին, ասաց` վախ, մամա ջան, մեռնում եմ». «Սասնա ծռերի» գործով տուժողը` մահացած ոստիկանի մասին
Հասարակություն
12.09.2018 | 12:06
Երևանի ընդհանուր իրավասության դատարանի Շենգավիթի նստավայրում դատավոր Մեսրոպ Մակյանի նախագահությամբ կայացավ «Սասնա ծռեր» խմբի գործով հերթական դատական նիստը: Այսօր ցուցմունք տվեց ՊՊԾ գնդի գրավման առաջին օրերին գնդից փախուստի դիմած ոստիկաններից Խաչատուր Մուրադյանը:
Նա նշեց, որ ՊՊԾ գնդի տարածքը լքել է հետևի ճանապարհով, բայց չի նկատել, թե ինչպես է վիրավորում ստացել ոստիկաններից Գագիկ Մկրտչյանը, ասաց՝ նրան տեսել է վիրավոր վիճակում. «Որովայնից արյուն էր ծորում, հենվեց պատին, ասաց` վախ մեռա: Հետո ես գնացել եմ զինապահեստի մոտ, որտեղ ինձ ասում էին, որ դռները բացեմ»:
Տուժողը Յուրի Տեփանոսյանի վիրավորում ստանալու դեպքում էլ ասաց՝ տեղյակ է եղել միայն հնչած կրակոցներից: Ամբաստանյալներից Արեգ Կյուրեղյանը տուժողին հարցրեց` իսկ տեղյա՞կ եք եղել, որ Հայաստանում իշխանությունը յուրացված է եղել, որին Մուրադյանը պատասխանեց` ոչ, տեղյակ չեմ եղել:
Դատավոր Մակյանն անդրադարձավ Պավել Մանուկյանի այն հայտարարությանը, որ ոստիկան Գագիկ Մկրտչյանը սպանվել է ոչ թե Արմեն Բիլյանի, այլ Էդուարդ Գրիգորյանի արձակած կրակոցից։ Նա տուժողին հարցրեց` գնդում լինելու ժամանակ լսե՞լ է, որ Գագիկ Մկրտչյանը սպանվել է Արմեն Բիլյանի կամ Էդուարդ Գրիգորյանի կրակոցից, ինչին տուժողը բացասական պատասխան տվեց:
Դրանից հետո հարցեր սկսեց տալ Պավել Մանուկյանը: Մասնավորապես հետաքրքրվեց` արդյոք Գագիկ Մկրտչյանը վիրավորված է եղել որովայնի՞ց, թե՞ վնասվածք է ստացել թիկունքից, տուժողն ասաց չի տեսել թիկունքից:
Մի քանի հարցերից հետո տուժողի ինքնազգացողությունը վատացավ: Նիստը տասը րոպեով ընդմիջվեց:
Նշենք, որ այս գործով անցնող 10 ամբաստանյալներից երեքն են, որ դեռ պահվում են կալանքի տակ: Նրանք են` Սմբատ Բարսեղյանը, Արմեն Բիլյանը, Պավել Մանուկյանը:
