ՍԴ-ն մեր հագից հանեց Փաշինյանի ասած կարմիր շորերը․ հիմա մերկ կանգնած ենք ցլերի առջև․ Էդմոն Մարուքյան․ ՏԵՍԱՆՅՈՒԹ

Սահմանադրական դատարանը օրերս ոչ միայն ՀՀ-ի Սահմանադրությանը համապատասխանող հռչակեց Հայաստան-Ադրբեջան սահմանազատման կանոնագիրքը, այլև անդրադարձավ Սահմանադրության տեքստում Անկախության հռչակագրին արված հղմանը։ Հիշեցնենք, Անկախության հռչակագրում նշվում է Հայաստանի և Լեռնային Ղարաբաղի վերամիավորման մասին Գերագույն խորհուրդների որոշման մասին, ինչը Ադրբեջանը համարում է տարածքային պահանջ իր նկատմամբ։ Սահմանադրական դատարանը եզրահանգել է՝ Սահմանադրության նախաբանի՝ «… հիմք ընդունելով Անկախության հռչակագրում հաստատագրված հայոց պետականության հիմնարար սկզբունքները և համազգային նպատակները» դրույթը չի վերաբերում որևէ սկզբունքի կամ նպատակի, որն ամրագրված չէ Սահմանադրությամբ»:

Ըստ էության, Հայաստանի Սահմանադրական դատարանը նշել է, որ Անկախության հռչակագրում նշված Հայաստանի և Լեռնային Ղարաբաղի վերամիավորման մասին Գերագույն խորհուրդների որոշումներին արված հղումը չունի իրավական ուժ, քանի որ այն որևէ կերպ մտցված չէ Հայաստանի Սահմանադրության մեջ, որևէ կերպ մեկնաբանված չէ Սահմանադրությունում։
«Լուսավոր Հայաստան» կուսակցության ղեկավար Էդմոն Մարուքյանը Factor TV-ի հետ զրույցում ասում է, որ ինքը Անկախության հռչակագրի մասով որոշման մեջ ինքը խնդիր չի տեսնում․ «Այո, հռչակագրի այն դրույթները, որոնց հղում է անում Ադրբեջանը, Սահմանադրության մաս չեն, և հետևաբար՝ Հայաստանի Հանրապետությունը չունի տարածքային պահանջ Ադրբեջանի նկատմամբ։ Այստեղ որևէ հարց չկա»։ Սակայն Մարուքյանի պնդմամբ՝ ՍԴ-ն չի անդրադարձել մեծ կարևորություն ունեցող այլ հարցերի․ «Առաջին հարցն այն է, որ ՍԴ-ն դիտարկելով սահմանազատման հանձնաժողովների կանոնակարգը, կառավարությունից չի պահանջել, որ ներկայացվի ՀՀ-ի համար ընդունելի քարտեզը, որով նրանք պատկերացնում են, որ պետք է կատարվի սահմանազատումը։ ՍԴ-ն պետք է պահանջեր այդ քարտեզը և կցեր այս որոշմանը, ասեր՝ շատ լավ, դե գնացեք սահմանազատեք։ Բացի այդ, ՍԴ-ն կարող էր իր՝ Բարձր դատարանի մակարդակում արձանագրել, որ ՀՀ կառավարության ասած քարտեզի և 29743 ք/կմ-ի մեջ ընդգրկված որոշ տարածքները այս պահին՝ օկուպացված են»,- ասաց Էդմոն Մարուքյանը։

Իրավիճակը մեկնաբանելով փոխաբերական իմաստով՝ «Լուսավոր Հայաստան» կուսակցության ղեկավարը նշեց՝ «ՍԴ-ն մեր հագից հանեց Փաշինյանի ասած կարմիր շորերը․ հիմա մերկ կանգնած ենք ցլերի առջև»։

Հարցազրույցն ամբողջությամբ՝ տեսանյութում։

Ռոբերտ Անանյան